Qeyri-stabil şəraitdə KİV azadlığı

Bakı/19.06.17/Turan: İyunun 19-da Vyanada ATƏT-in "Qeyri-stabil şəraitdə KİV azadlığı" adlı ikigünlük konfransı işə başlayır.

ATƏT-in KİV azadlığı məsələləri üzrə nümayəndəsinin Bürosu tərəfindən təşkil edilən konfransda 200-dən çox beynəlxalq ekspert və jurnalist, hökumət məmuru və diplomat, vətəndaş cəmiyyəti və elmi dairələrin nümayəndələri iştirak edəcəklər.

Konfrans ATƏT regionunda, əsasən münaqişə və böhranlardan ziyan dəyən regionlarda KİV azadlığını məhdudlaşdıran təzyiq hallarının və maneələrin artması kontekstində keçirilir.

Tədbirdə söz azadlığı, "saxta xəbərlər", münaqişə zonalarında akkreditasiya və informasiya çatımlığı, KİV və kompüter savadlılığı, jurnalistlərin təhlükəsizliyi və onlara qarşı cinayətlərin cəzasız qalması üzrə sessiyalar təşkil olunacaq.

İştirakçılar regionda KİV azadlığı qarşısında duran aktual məsələləri müzakirə edəcəklər, həmçinin jurnalistlərin təhlükəsizliyi, dezinformasiya və münaqişəli vəziyyətlərdə təbliğat kimi məsələlər üzrə tövsiyələr verəcəklər.

Konfransın gedişi osce.org/live efirində birbaşa yayımlanacaq. Bu barədə ATƏT-in KİV azadlığı məsələləri üzrə nümayəndəsinin Bürosu məlumat yayıb. -0-