Qubad İbadoğlunun müayinə və analiz nəticələri saxtalaşdırılıb

Bakı/11.09.23/Turan: "Hakimiyyət Avropa İnsan Haqları Məhkəməsinə təqdim etmək üçün tərtib etdiyi sağlamlıq sənədlərində qardaşımın səhhəti ilə bağlı 25 iyuldan başlayaraq keçirilmiş müxtəlif müayinə və analizlərin nəticələrində total saxtalaşdırma aparıb". Bu barədə Qubad İbadoğlunun qardaşı Qalib Bayramov Facebook-da yazıb. 

Onun sözlərinə görə, Tibbi nəticələrin alınması üçün vəkil Zibeydə Sadıqova iyulun sonundan dayanmadan sorğu göndərib, ya imtina gəlib, ya cavab verməyiblər.

"Sonuncu sorğu ilə bağlı sentyabrın 4-də Ədliyyə Nazirliyinin Tibb Baş İdarəsinin Bakı İstintaq Təcridxanası üzrə kuratoru Elnur Məmmədovla danışdım, nəticələri istədim, dedi, 10 günə versək, şükür edin. Ancaq səhərisi gün tez-tələsik Zibeydə xanıma zəng edib ki, gəlin sənədləri götürün və yarım-yarımçıq nəticələri (cəmi 21 səhifə, halbuki tam nəticə 80 səhifəyə yaxındır) veriblər", deyə Bayramov qeyd edib.

"Nəticələri bir neçə həkimlə (kardioloq, endokrinoloq) analiz etmişik.

Tam fiasko!

Xolesterin, hemoqlabin, ALT, AST, Kreatinin, qan təzyiqi, xülasə, bütün göstəricilər ideal səviyyədə, heç bir göstəricidə kənaraçıxma yoxdur, obyektiv görünmək xatirinə yalnız qanda şəkərlə bağlı göstəricini bir qədər atrırıblar, onu da olduğu kimi yazmağa cəsarət etməyiblər.

Bunlar hətta o qədər uzağa gediblər ki, qardaşımın dediklərini də saxtalaşdırıblar. "Məhkumun tibbi kitabçası"nda bir neçə dəfə həyasızcasına yazıblar ki, Qubad İbadoğlu bizə səhhəti ilə bağlı heç bir şikayətinin, narahatlığının olmadığını dedi", deyə Bayramov yazır.

Aşağıdakı faktlar nəticələrin saxtalaşdırılmasını təsdiq edir: Bütün analiz nəticələrinin qələmlə, əllə (manual) yazılması - hazırda bütün kliniklarada xəstənin ID göstəriciləri komputerə daxil edilir və komputer özü nəticələri emal etdikdən sonra onları avtomatik qeyd edir, göstəriciləri əllə yazmağa ehtiyac qalmır; təqdim olunan analiz nəticələrinin bəzilərinin sonunda həkim-laborantın adının olmaması - nəticələrin bəzilərinin sonunda həkimin yalnız imzası var, adı, soyadı yoxdur; Qanın biokimyəvi analizinin bütün göstəricilərinin norma daxilində olması - ürəyində aortanın anevrizması, sol mədəciyin hipertrofiyası və diastolik disfunksiya kimi ciddi problemləri , yüksək şəkəri və arterial təzyiqi olan, iki aya yaxın müddətdə həbsxanada oturaq həyat tərzi keçirən şəxsin qan analizi nəticələri bu qədər ideal ola bilməz, deyə Qubad İbadoğlunun qardaşı qeyd edib. 16B