Qutuların şəffaf olmadığı bildirilir

Bakı/09.02.20/Turan: 29 saylı Səbail seçki dairəsində 19 saylı məntəqədə qutunun biri şəffaf olmadığı bildirilir.

Bu barədə AzadlıqRadiosuna həmin dairədən deputatlığa namizəd Fərəc Kərimli məlumat verib. Onun sözlərinə görə, bu hal Seçki Məcəlləsinə ziddir. "Müşahidəçilərimiz bunu aktlaşdırdılar və məntəqə seçki komissiyasına məlumat verərək qutunu dəyişmək vacib olduğunu dedilər. Lakin hələ də bu istiqamətdə heç bir tədbir görülməyib".

29 saylı Səbail seçki dairəsi komissiyasından isə Turana bildirilib ki, 19 saylı məntəqədə olan qutuların ikisi də şəffafdır. "Həmin məntəqədə veb-kamera quraşdırılıb, özünüz də baxa bilərsiniz ki, qutular şəffafdır. Qutular ortadadır və şəffaf olub-olmaması dərhal görünür. Məntəqələrdə olan qutuların hamısı şəffafdır".

Eyni hal 15 saylı Yasamal birinci seçki dairәsinin 12 saylı mәntәqәsindә qeydə alınıb. Müşahidəçilər AzadlıqRadiosuna bildirib ki, seçki qutulardan biri şəffaf deyil. "Məntəqə seçki komissiyasına iradımızı bildirdik, onlar isə deyib ki, onlara qutular Mərkəzi Seçki Komissiyasından gəlir və ora müraciət etməyə məsləhət gördülər. İndi aktlaşdırıb müraciət edəcəyik".

15 saylı Yasamal birinci seçki dairәsinin katibi isə Turana bu məlumatı təkzib edib. "Belə şey ola bilməz, qutuları məntəqələrə biz vermişik, qutular şəffafdır". –0--