Ramil Usubovdan polisə seçki tapşırıqları

Bakı/16.03.18/Turan: Daxili İşlər Nazirliyi (DİN) aprelin 11-də keçiriləcək prezident seçkiləri günü vətəndaşların öz iradəsini sərbəst və azad ifadə etməsi üçün vacib olan ictimai asayişin və təhlükəsizliyin etibarlı qorunması məqsədilə tədbirlər planı təsdiq edib. Planın icrası üçün zəruri tədbirlər görülür.

Bu haqda martın 16-da DİN-də keçirilmiş kollegiya iclasında nazir Ramil Usubov məlumat verib.

Nazir seçkilərdə bütün səsvermə hüququ olanların şəxsiyyəti təsdiq edən sənədlərlə təmin edilməsi ilə bağlı görülən işlərdən bəhs edib, paytaxtda və bölgələrdə səyyar xidmətlərin keçirildiyini vurğulayıb.

R.Usubov prezidentliyə namizədlərin təbliğat-təşviqat apardıqları yerlərdə ictimai asayişin etibarlı mühafizə olunmasını və sair aidiyyatı olan məsələlərin həllini müvafiq orqanların rəhbərlərindən tələb edib.

Nazir deyib ki, ölkə rəhbərliyi daxili işlər orqanlarına hər zaman ali diqqət və qayğı göstərir, aylıq vəzifə maaşlarının artırılması bunun növbəti əyani təzahürüdür. O, əmin olduğunu bildirib ki, şəxsi heyət qarşıda duran məsul vəzifələri bundan sonra da layiqincə yerinə yetirəcək, yüksək etimadı doğrultmağa çalışacaq.

Nazirliyin Baş İctimai Təhlükəsizlik İdarəsinin rəisi Oqtay Kərimov isə deyib ki, seçkilərin gedişi, qanun pozuntuları barədə daxil olmuş məlumatların yoxlanılaraq zəruri tədbirlərin görülməsi məqsədilə nazirlikdə xüsusi işçi qrupu, Bakı Şəhər Baş Polis İdarəsində isə xüsusi operativ qrup yaradılıb. O, seçki prosesi ilə bağlı polis əməkdaşlarının bilgiləndirilməsi istiqamətində görülən işlərdən bəhs edib.

"Daxili İşlər Nazirliyinin bütün orqan və hissələri gücləndirilmiş iş rejimində xidmət aparacaq, dairə və məntəqə seçki komissiyalarının mühafizəsini təmin edəcək 12000-dən artıq polis əməkdaşı bütün zəruri xüsusi və digər vasitələrlə tam təchiz olunub. İctimai yerlərdə, o cümlədən küçələrdə hüquq qaydasının təmin edilməsinə cəlb olunan naryadarın sayı artırılıb", o, bildirib.

Nazirliyin Baş Pasport, Qeydiyyat və Miqrasiya İdarəsinin rəisi Nüsrət Şirinov vətəndaşların şəxsiyyət vəsiqələri ilə təmin edilməsi sahəsində görülən işlərdən danışıb. Onun verdiyi məlumata görə, ötən il mayın 16-dan bu il martın 1-dək 14 min nəfərə şəxsiyyət vəsiqəsi verilib. 2001-ci ilin sentyabrından bu ilin martınadək isə 8 milyon 614 min 710 vətəndaş, o cümlədən 16 yaşdan yuxarı 6 milyon 748 min 524 nəfər şəxsiyyət vəsiqəsi ilə təmin edilib.