REAL: iqtidar yeni nəsil siyasətciləri rəqabətdən cəkinir

 Bu gün Respublikaçı Alternativ Hərəkatının  (REAL) lideri ilqar Məmmədovun prezidentliyə namizədliyinin Mərkəzi Seçki Komissiyası tərəfindən qeydiyyata alınmaması ilə əlaqədar Bakı Apellyasiya Məhkəməsinə şikayət verilib.  Bunu REAL-ın  icra katibi Natiq Cəfərli  bu gün RATİ -nin mətbuat mərkəzində keçirilən  konfransda bildirib. O MSK nin qərarını qanunsuz, qərəzli və siyasi motivli adlandırıb. Məmmədovun səlahiyyətli nümayəndəsinə təqdim olunan MSK-nın rəsmi qərarında göstərilir ki, İlqar  Məmmədovun xeyrinə təqdim olunmuş 41247 seçici imzasından 893 də seçicilərin şəxsiyyət vəsiqəsi ilə bağlı problemlər aşkar olunmuşdur, digər tərəfdən MSK- nın qərarında göstərilir ki 4900 imza isə ehtimal olunur ki, saxtalaşdırılıb. Cəfərli bu ehtimal olunma bəhanəsi ilə edilən  əsaslandırmanı absurd hesab edib və qeyd edib ki, əslində problemli sayılan imzaların sayını çıxdıqda belə İ. Məmmədov qeydə alınmalı idi. Onun sözlərinə görə İlqar Məmmədovun seçkiyə buraxılması hakimiyyətin strateji baxışlarına zidd idi. Çünki bu halda seçicilərin seçkiyə marağı artacaqdı, ölkədə daha rəqabətli seçki abu-havası yaranacaqdı. Bundan başqa Məmmədov qeydə alınacağı təqdirdə o həbsdən azad olunacaqdı və bu da ölkədə yeni etiraz dalğasının vüsət almasına təkan verəcəkdi və sonra demokratik qüvvələrin qalibiyyətinə gətirib çıxaracaqdı.

Öz növbəsində REAL Hərəkatının Məclisinin sədri Erkin Qədirli  xatırladıb ki, hakimiyyət hələ İlqar Məmmədovun namizədliyini təsdiq edilməsi mərhələsində süni problemlər yaratmış və bu məsələ yalnız  imza toplama kampaniyasının bitməsinə 10 gün qalmış həll olunmuşdur. “Qısa vaxt qalmasına baxmayaraq REAL hərəkatı gənclərin fəal dəstəyi nəticəsində sosial şəbəkələrdən edilən çağırışlara fəal cavab gəlməsi sayəsində lazım olan imzaları təqdim etmişdir”-, deyə Qədirli qeyd edib. Onun fikrincə Məmmədovun qeydə alınmaması  onunla əlaqədardır ki, hakimiyyət ölkədə yeni nəsil siyasətçilərin xalqa tanıdılmasını istəmir. Qədirli bildirib ki, Məmmədovu iqtidar öncədən seçkiyə buraxmaq istəmirdi və onun həbsi məhz bununla əlaqədar idi. Namizədliyinin təsdiqinə gəldikdə isə, Qədirlinin ehtimalına görə hakimiyyət güman etmirdi ki, qısa zaman kəsiyində Məmmədovun xeyrinə 40000 imzanın toplanması mümkün olacaq. REAL Hərəkatının İdarə Heyətinin üzvü Zöhrab İsmayıl bildirib ki, imza toplama kampaniyası REAL hərəkatına bölgələrdə də böyük rəğbətin olduğunu göstərdi. “ Misal üçün Gəncə şəhərində 1000-dən çox imza toplanmışdır, Xaçmaz, Göyçay və bir çox digər bölgələrdə də xeyli sayda imza toplamaq mümkün olmuşdur. Bu uğurlu kampaniya REAL-a imkan verir ki, partiya quruculuğunu sürətləndirsin və ola bilər ki, artıq seçkilərə qədər REAL-ın  siyasi partiyaya çevrilməsi barədə qərar verilsin və təsis toplantısı keçirilsin”-, deyə İsmayıl əlavə edib. Qədirli isə ona diqqət yetirib ki, Avropa İnsan Məhkəməsinin Azərbaycan hökumətinə göndərdiyi kommunikasiya sorğusuna cavabında rəsmi Bakı Məmmədovun  heç kimsəni təmsil etmədiyini qeyd edib və imza toplama kampaniyası bunu açıq aydın şəkildə təkzib etdi.

Sonda Cəfərli bildirib ki,  seçki  imza toplama kampaniyası REAL-ın kiçik qələbəsi idi  və bu da gələcəkdə böyük qələbəyə aparan yolun başlanğıcıdır.

Tədbirdə REAL Hərəkatı üzvləri İlqar Məmmədovun namizəd kimi qeyd alınması üçün bütün hüquqi vasitələr tükəndikdən sonra və uğur əldə etmədikləri halda REAL Hərəkatı olaraq Cəmil Həsənliyə seçkilərdə dəstək verəcəklərini də qeyd ediblər.—06D--