ReAl referendumda təşviqat üçün «Respublikaçı Alternativ» təşəbbüs qrupunu yaradıb

ReAl hərəkatı dünən Konstitusiyaya düzəlişlər üzrə referendumda təşviqat aparmaq üçün “Respublikaçı Alternativ” təşəbbüs qrupunu yaradıb. Bu gün ReAl 2 mindən çox seçicinin iştirakı ilə təşəbbüs qrupunun yaradılması haqqında bildirişi MSK-ya təqdim edəcək, bu barədə Turan-a təşkilatdan bildiriblər.

MSK beş gün ərzində ərizəyə baxmalı və təşəbbüs qrupuna referendumda qrupun qeydiyyatı məqsədilə ən az 40 min seçici imzası toplamaq üçün blanklar verməlidir.

Təşviqat qrupunun qeydiyyatı bütün Azərbaycan ərazisində düzəlişlərin lehinə və ya əleyhinə təşviqat aparmağa imkan verir, televiziya efirinə pulsuz çıxışı, seçicilərlə açıq və qapalı yerlərdə görüşlər keçirmək imkanınə təmin edir.

İmza vərəqələrinin təqdim edilməsi üçün son tarix 22 avqustdur.

ReAl düzəlişlərin Azərbaycanda avtoritarizmin gücləndirilməsinə yönəldiyini hesab edərək, onların əleyhinə təşviqat aparmaq niyyətindədir.

Xatırladaq ki, referendum sentyabrın 26-na təyin edilib. Konstitusiyaya düzəlişlər prezidentin səlahiyyətlərinin genişləndirilməsini, ona parlamenti buraxmaq hüququ verilməsini, birinci vitse-prezident və vitse-prezidentlərin təyin edilməsini nəzərdə tutur. Bundan başqa, prezidentin səlahiyyət müddəti 5 ildən 7 ilə qədər artırılır. -06D-