Rəcəb Tayyib Ərdoğan: “Putinin mövqeyi Dağlıq Qarabağda gərginliyi azaltmağa imkan verdi”

Bakı/10.12.20/Turan: Rusiya prezidenti Vladimir Putinin pozitiv mövqeyi Dağlıq Qarabağda münaqişənin eskalasiyasını azaltmağa və prosesləri müsbət məcraya yönəltməyə imkan verdi. Bu barədə dekabrın 10-da Bakıda Türkiyə prezidenti Rəcəb Tayyib Ərdoğan prezident İlham Əliyevlə danışıqların yekunlarına dair brifinqdə bildirib.

Türkiyə və onun sakinləri erməni xalqına nifrət bəsləmir. "Bütün problem Ermənistan rəhbərliyilədir ", - Ərdoğan deyib və əlavə edib ki, bu gün Türkiyədə 100 mindən çox Ermənistan vətəndaşı yaşayır və işləyir.

Türkiyə prezidenti Ermənistanla sərhəddin açılması ehtimalını şərh edib. "Əgər Yerevan Ankaraya qarşı müsbət addımlar atarsa, sərhədləri açarıq. Sərhəddi əbədi olaraq bağlı saxlamaq istəyimiz yoxdur", - Ərdoğan vurğulayıb.

O həmçinin Fransa parlamentarilərinin Dağlıq Qarabağın tanınması barədə qərarını pisləyib. "Bu qurumu heç Ermənistan tanımır, Fransa prezidenti Emmanuel Makron isə parlament vasitəsilə belə təşəbbüs göstərməyə cəhd edir. Bu, Makronun siyasətçi olmadığını göstərir", - Ərdoğan deyib. -0-