RF Bakının təklif etdiyi nizamlama prinsiplərini dəstəkləyir

Bakı/21.04.22/Turan: Yaxın günlərdə Rusiya xarici işlər nazirinin Azərbaycan və Ermənistan arasında münasibətlərin normallaşdırılması üzrə nümayəndəsi İqor Xovayev Bakıya səfər edəcək. Onun vəzifəsi Azərbaycana və Ermənistana sülh sazişinin hazırlanmasına yardım etməkdən ibarətdir. Bu barədə çərşənbə günü keçirilən brifinqdə RF XİN-in mətbuat katibi Mariya Zaxarova bildirib.

"Xüsusi nümayəndə işə fəal şəkildə cəlb edilib. O, artıq Yerevanda faydalı məsləhətləşmələr aparıb. Yaxın günlərdə onun Bakıya səfəri razılaşdırılıb.

Dialoqun əsasını Azərbaycanın təklif etdiyi "Azərbaycan və Ermənistan arasında dövlətlərarası münasibətlər qurulması üçün təməl prinsiplər" və Yerevanın bu təkliflərə konstruktiv reaksiyası təşkil edir.

Rusiyanın vasitəçilik səyləri Rusiya, Azərbaycan və Ermənistan liderlərinin 9 noyabr 2020, 11 yanvar və 26 noyabr 2021-ci il tarixli bəyanatlarının işlənib hazırlanmasındakı əvəzolunmaz təcrübəyə söykənir. Bu bəyanatlar regionda qan axıdılmasını dayandırmağa imkan verib və nəqliyyat kommunikasiyalarının bərpası və Ermənistan-Azərbaycan sərhədinin delimitasiyası kimi humanitar vəzifələrin həlli üçün real perspektivlər açıb", deyə o bildirib. -02D-