![H. Ruhani D. Bayramovu qəbul edir. IRNA](https://turan.az/resized/media/2020/main/120900035292-750-500-resize.webp)
H. Ruhani D. Bayramovu qəbul edir. IRNA
Ruhani: “İran Azərbaycan Respublikası ilə münasibətləri genişləndirmək niyyətindədir”
Bakı/09.12.20/Turan: İran prezidenti Həsən Ruhani Azərbaycan Respublikasının xarici işlər naziri Ceyhun Bayramovla görüş zamanı ikitərəfli əlaqələrin genişləndirilməsi üçün yeni beynəlxalq vəziyyətdən istifadə olunacağına ümid etdiyini bildirib, Tehranla Bakı arasındakı münasibətləri yaxşı və qardaş münasibətlər adlandırıb. Bu barədə İRNA-nın məlumatında deyilir.
Ruhani Dağlıq Qarabağ münaqişəsinin başa çatmasından, Azərbaycan Respublikasının işğal olunmuş torpaqlarının azad edilməsindən və atəşkəs rejiminin bərpa edilməsindən məmnunluğunu ifadə edib, Azərbaycan Respublikasının ərazi bütövlüyünün dəstəklənməsində İranın dəqiq mövqe tutduğunu bildirib.
İran prezidenti Tehranın Qarabağ münaqişəsinin nizamlanması üçün hazırladığı planı və ölkənin xüsusi nümayəndəsinin Rusiyaya, Azərbaycan Respublikasına və Ermənistana səfərini diqqətə çatdırıb, iki ölkə arasında atəşkəs rejiminin möhkəmlənməsində və regionda sabitliyin bərqərarında İslam Respublikasının konstruktiv rol oynamağa hazır olduğunu bildirib.
"Donald Trampın müddətinin başa çatmasını və ABŞ-da yeni administrasiyanın hakimiyyətə gəlməsini nəzərə alaraq, bizim əməkdaşlıq üçün yaxşı vəziyyətimiz olacaq", - o deyib və ticarət, iqtisadi əməkdaşlığın inkişafı üçün ümumi sərhədlərdən istifadənin vacibliyini qeyd edib.
Ruhani qeyd edib ki, İslam Respublikasının qonşuluğunu və imkanlarını nəzərə alaraq, İranın Azərbaycan Respublikasının işğaldan azad edilmiş ərazilərinin bərpası sahəsində iştirakı hər iki ölkənin xeyrinə olacaq.
O həmçinin İran ilə Azərbaycan Respublikası arasında əvvəlki razılaşmaların həyata keçirilməsinin sürətləndirilməsinin, o cümlədən Rəşt-Astara dəmir yolunun tikintisinin zəruriliyini vurğulayıb.
Bundan əlavə, Ruhani bildirib ki, birgə layihələrin reallaşdırılması üçün şərait yaradılıb. Buraya Xudafərin hidroqovşağının və elektrik stansiyasının yaradılması da daxildir. Hər iki ölkə sənaye, elm, əczaçılıq sahələrində əməkdaşlığı inkişaf etdirə bilər.
Görüş zamanı C.Bayramov Azərbaycan Respublikasının ərazi bütövlüyünü dəstəklədiyinə görə İrana minnətdarlığını bildirib, İranı yaxşı və dost qonşu adlandırıb.
"Azərbaycan Respublikası rəhbərliyinin iradəsi İranla ümumi əlaqələrin genişləndirilməsinə yönəlib", - o qeyd edib. Və əlavə edib ki, ölkənin işğal olunmuş ərazilərinin azad edilməsi və İranla ümumi sərhədlərin bərpası iki ölkə arasında yeni layihələrə gətirib çıxaracaq.
O həmçinin Azərbaycan Respublikasının İranla sərhəddini dostluq və inkişaf sərhəddi adlandırıb.
Azərbaycan Respublikasının XİN rəhbəri qeyd edib ki, yeni beynəlxalq vəziyyəti və ABŞ-ın sanksiyaları səbəbindən məhdudiyyətlərin aradan qaldırılmasını nəzərə alaraq, iki ölkə arasında birgə layihələr tezliklə yerinə yetiriləcək.
O həmçinin iranlı nüvə alimi Möhsen Fəxrizadənin qətlini kəskin şəkildə pisləyib və bu aktı qəbuledilməz adlandırıb.0—
Siyasət
-
Penitensiar Xidmətin Müalicə müəssisəsində saxlanılan, 45 gündür aclıq aksiyası keçirən İstanbul Universitetinin doktorantı Fazil Qaımovun anası Tahirə Qasımova oğlunu ölümdən xilas etmək məqsədi ilə iyulun 28-də ictimaiyyətə müraciət edib.
-
İyulun 26-da “III Respublika Platforması” bəyanat yayaraq, bu qurumun həbsdə olan rəhbəri Akif Qurbanovun azyaşlı uşaqlarının elektron cihazlarının qanunsuz ələ keçirilməsinə diqqət çəkiblər.
-
İyulun 19-dan iyulun 26-dək Xankəndidə 24 avtomat, 1 pulemyot, 9 tüfəng, 28 qumbara, 441 mərmi, 3118 müxtəlif çaplı patron və digər döyüş sursatları aşkar edilib, bu barədə Daxili İşlər Nazirliyi məlumat yayıb.
-
Prezident İlham Əliyev fərmanla müdafiə sahəsində hərbi kəşfiyyat sahəsində əməkdaşlıq haqqında Azərbaycan-Qazaxıstan hökumətlərarası sazişi təsdiq edib.
Rəy yaz