Rusiya “Azadlıq” radiosunun həbs edilmiş müxbiri ilə konsulluq əməkdaşlarının görüşünə icazə vermir

Vaşınqton/02.11.23/Turan: Rusiya hökuməti ABŞ-ın Kazanda saxlanılan və həbsdə olan rusiyalı və amerikalı jurnalist Alsu Kurmaşeva ilə görüşmək xahişini hələ də təmin etməyib.

Kurmaşeva (“Azadlıq” radiosunun tatar-başqırd xidmətinin redaktoru) xarici agent kimi qeydiyyatdan keçməməkdə ittiham olunur.

Çərşənbə axşamı Rusiya məhkəməsi onun həbs qətimkan tədbiri ilə bağlı şikayətini rədd edib.

“Biz onun vəkilləri və “Azadlıq” radiosu ilə əlaqə saxlamağa davam edirik”...

Biz konsulluğun onunla əlaqəsini yaratmağa çalışırıq, lakin bu baş verməyib.

Biz Rusiya hökumətini bunu mümkün qədər tez təmin etməyə çağırırıq”, - Dövlət Departamentinin rəsmi nümayəndəsi Metyu Miller brifinq zamanı Turan-ın müxbirinə bildirib.

O, həmçinin bildirib ki, Moskva indiyədək Kurmaşevanın həbsi ilə bağlı rəsmi bildiriş təqdim etməyib, "baxmayaraq ki, bu, açıq-aşkardır", - Miller əlavə edib.

*Alsu Kurmaşeva ABŞ və Rusiya vətəndaşıdır, ailəsi ilə birlikdə Praqada yaşayır. Mayın ortalarında ailə səbəblərinə görə Rusiyaya gəlib. O, iyunun 2-də Çexiyaya qayıdarkən Kazan hava limanında saxlanılıb.

Daha sonra Kazan məhkəməsi onu ikinci vətəndaşlığı barədə Rusiya hakimiyyət orqanlarına məlumat vermədiyinə görə cərimələyib.

Jurnalist oktyabrın 18-də yenidən saxlanılıb, oktyabrın 23-də isə həbs edilib və Tatarıstan Ali Məhkəməsi onu dekabrın 5-dək həbsdə saxlayıb. 0