Rusiya-Türkiyə Xarici İşlər nazirlikləri arasında məsləhətləşmələrdə Qarabağ müzakirə edilib

Moskva/10.06.21/Turan: İyunun 8-də Moskvada Türkiyənin xarici işlər nazirinin müavini Önal ilə Rusiya-Türkiyə Xarici İşlər nazirlikləri arasında məsləhətləşmələr keçirilib. Məsləhətləşmələrdə Rusiya tərəfdən Rusiya Federasiyası xarici işlər nazirinin müavinləri Verşinin, Qruşko və Rudenko iştirak ediblər. Bu barədə Rusiya Xarici İşlər Nazirliyinin mətbuat xidməti məlumat verib.

Tərəflər Suriya, Dağlıq Qarabağ, Fələstin-İsrail və digər regional böhranların həllinə beynəlxalq yardım məsələlərini, onların beynəlxalq normalar və Birləşmiş Millətlər Təşkilatı  Təhlükəsizlik Şurasının müvafiq qətnamələri əsasında nizamlanmasının siyasi aspektlərini nəzərdən keçiriblər.

Dağlıq Qarabağ münaqişəsi zonasında atəşkəsə nəzarət və bütün hərbi əməliyyatlar üzrə Rusiya-Türkiyə Birgə Mərkəzinin fəaliyyətinə yüksək qiymət verilib. Zaqafqaziyada iqtisadi və nəqliyyat əlaqələrinin açılması üzərində işin davam etdirilməsi barədə razılığa gəlinib, Rusiya Xarici İşlər Nazirliyi qeyd edib.

Məsləhətləşmələrin iştirakçıları Rusiya-Türkiyə siyasi dialoqunun yüksək dinamikasının saxlanmasının vacibliyi barədə yekdil fikrə gəliblər. -02D-