Rusiya Xarici İşlər Nazirliyi Azərbaycanın neft infrastrukturuna zərbə endirilməsinə çağıran deputatın fikirlərini pisləyib

Bakı/29.03.22/Turan: Dövlət Dumasının deputatı Mixail Delyaqinin Azərbaycanla bağlı söylədikləri qətiyyən yolverilməzdir və məsuliyyətsizdir. Bu barədə çərşənbə axşamı brifinqdə Rusiya Xarici İşlər Nazirliyinin nümayəndəsi Mariya Zaxarova bildirib.

“İstənilən bu cür bəyanatları tamamilə yolverilməz və məsuliyyətsiz hesab edirik. Onlar heç bir halda ölkəmizin, Rusiya rəhbərliyinin Bakı ilə qarşılıqlı müttəfiqlik əlaqələrinin və strateji tərəfdaşlığın qurulmasına yönələn rəsmi mövqeyini əks etdirmir. Əminik ki, ölkəmizin Dövlət Dumasının rəhbərliyi tərəfindən də bu cür təxribat xarakterli fikirlərə lazımi qiymət veriləcək”.

Xatırladaq ki, bir gün öncə Delyaqin Rusiya Dövlət Televiziyasının efirində Azərbaycanın neft infrastrukturuna zərbə endirməyə çağırıb. Bununla yanaşı, o, Azərbaycanı Amerikanın "satellit"i və "proksi-dövlət"adlandırıb. -02D-