Rusiya Xarici İşlər Nazirliyi:  Qarabağda "etnik təmizləmə" barədə fikirlər beynəlxalq təşkilatların rəylərilə təsdiqlənməyib

Rusiya, Ermənistan və Azərbaycan liderlərinin 2020-2022-ci illərdəki üçtərəfli razılaşmaları hələ də Ermənistan-Azərbaycan barışığının əsasını təşkil edir və onlara alternativ yoxdur. Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova avqustun 28-də brifinq zamanı "Əgər Moskva 9 noyabr tarixli üçtərəfli bəyanatı hələ də qüvvədə hesab edirsə, erməni əhalinin Dağlıq Qarabağa qayıtması məsələsinin həllini necə görür" sualına cavabında bildirib.

O qeyd  ki, Ermənistanda rəsmi səviyyədə bu razılaşmalardan imtina barədə heç bir bəyanat olmayıb.

Ermənilərin Qarabağa qayıtması məsələsinə gəlincə, Zaxarova belə deyib:  “Rusiyanın erməni əhalinin öz tarixi vətəninə – Dağlıq Qarabağa qayıtması məsələsinin həllini necə görməsilə bağlı sizin sualınıza gəlincə,  bəs Ermənistanın baş naziri Paşinyan bunu necə görür? Onun bundan ötrü hər hansı proqramı varmı? Onlarla məmnuniyyətlə tanış olmaq və şərh etmək istərdim.

Əhalinin oraya qayıtması ilə bağlı Azərbaycan tərəfinin proqramını gördüm. Niyə başqa dövlətin nümayəndəsindən öz baxışınız   barədə soruşursunuz? Rusiya tərəfləri bu məsələni həll etməyə təşviq edir. Ancaq üçtərəfli razılaşmalar həyata keçirilmədən bunu etmək çətindir".

Onun sözlərinə görə, "bu razılaşmalar Bakı və Yerevan arasında münasibətlərin normallaşmasının bütün əsas yollarını, o cümlədən sülh müqaviləsinin hazırlanmasını, sərhədin delimitasiyası və demarkasiyasını, regionda nəqliyyat kommunikasiyalarının açılmasını, vətəndaş cəmiyyəti xəttilə əlaqələrin inkişafını əhatə edir". "Onları şübhə altına almağa cəhd etmək çox təhlükəlidir. Bu, ikitərəfli münasibətlərin hələ də tənzimlənməməsi şəraitində tərəflərin qarşılıqlı öhdəliklərində vakuum yaradacaq", - Zaxarova vurğulayıb.

Erməni jurnalistin "Qarabağda etnik təmizləmə" ifadəsindən istifadə etməsilə bağlı Zaxarova deyib ki, bu fikir beynəlxalq təşkilatların rəylərində öz əksini tapmayıb.

"Yarım il öncə biz etnik təmizləmə mövzusunda söhbət etdik. O vaxt mən Ermənistan tərəfindən tanınan beynəlxalq təşkilatların nümayəndələrinin hər hansı nəticəyə gəlməsi barədə soruşdum. Bu mövzuda beynəlxalq təşkilatların və ya ekspertlərin "qələmindən" çıxan bir qərar və ya qiymətləndirmə təqdim etmədiniz. Əgər indi bunlar sizdə varsa, onları mənimlə bölüşün", - Zaxarova deyib.