Rusiya Xarici İşlər Nazirliyinin nümayəndəsi Zəngəzur dəhlizi layihəsinin reallaşması barədə

Azərbaycanın əsas hissəsini Ermənistan ərazisi vasitəsilə Naxçıvan Muxtar Respublikası ilə birləşdirəcək marşrut bir sıra digər marşrutlarla yanaşı, Cənubi Qafqazda bütün iqtisadi və nəqliyyat əlaqələrinin açılması üzrə üçtərəfli işçi qrupu çərçivəsində müzakirə olunur. Bu barədə dünənki brifinq zamanı Rusiya Xarici İşlər Nazirliyinin rəsmi nümayəndəsi Mariya Zaxarova İranın Zəngəzur dəhlizi layihəsinə qarşı çıxışını şərh etmək xahişinə cavab verərkən deyib.

"Biz İranın rəsmi şəxslərinin Zəngəzur dəhlizinin çəkilməsi ideyası ilə bağlı narahatlığını ifadə edən bəyanatlarını gördük. Belə münasibətin səbəblərini aydınlaşdırmaq üçün birbaşa Tehrana müraciət etməyi tövsiyə edərdik", - Zaxarova deyib.

Bakı və Yerevan arasında əlaqələrin açılması ilə bağlı Moskvanın mövqeyi məlumdur. "Hesab edirik ki, müvafiq razılaşmalar tərəflərin qarşılıqlı razılığı və qarşılıqlı məqbul şərtlər əsasında əldə ediləcək və həyata keçiriləcək ki, bu da həm Azərbaycanın  və Ermənistan, həm də region üzrə qonşu ölkələrin - Rusiya, İran və Türkiyənin maraqlarına cavab verəcək”, – Zaxarova  deyib.

Qeyd edək ki, nəqliyyat əlaqələrinin açılması üzrə üçtərəfli işçi qrupu Rusiya, Azərbaycan və Ermənistan baş nazirlərinin müavinləri - Overçuk, Mustafayev və Qriqoryanın sədrliyilə yaradılıb.

Ancaq bir ildir ki, qrupun iclasları keçirilmir.