Rusiya Xəzərin hüquqi statusu haqda Konvensiyanı ratifikasiya edib

Bakı/19.09.19/Turan: Rusiya Federasiyasının Dövlət Duması cümə axşamı iclasda Xəzər dənizinin hüquqi statusu haqqında Konvensiyanı ratifikasiya edib, TASS agentliyi məlumat yayıb.

Xəzər dənizinin hüquqi statusu haqqında Konvensiya 2018-ci ilin avqustunda V Xəzər sammitində Azərbaycan, İran, Qazaxıstan, Rusiya və Türkmənistan tərəfindən imzalanıb.

Bu beynəlxalq müqavilə Xəzər dənizinə dair 1921-ci və 1940-cı illər sovet-İran müqavilələrini əvəzləyib.

Konvensiyaya uyğun olaraq Xəzər dənizinin su səthinin əsas hissəsi göl yox, dəniz kimi tanınır.

Xəzər dənizi tərəflərin ümumi istifadəsində qalır, dənizin dibi və təki qonşu dövlətlər arasında beynəlxalq hüquq əsasında bağlanmış müaviləyə uyğun olaraq bölünür. Gəmiçilik, balıqçılıq, elmi araşdırmalar və magistral boru kəmərlərinin çəkilişi tərəflər arasında razılaşdırılmış qaydalara əsasən həyata keçirilir.

Əsasən dənizin dibi ilə magistral boru kəmərinin çəkilişi zamanı ancaq boru kəmərinin keçəcəyi ölkənin razılığı lazımdır.

Konvensiyada Xəzərdə müqavilə tərəflərinə məxsus olmayan silahlı qüvvələrin iştirakının yolverilməzliyi barədə müddəa yer alıb, həmçinin dənizdə təhlükəsizliyin saxlanmasına və onun resurslarının idarə olunmasına görə beş Xəzəryanı dövlətin məsuliyyət daşıdığı müəyyən edilib.

"Xəzər dənizi mühüm geosiyasi, ticarət-iqtisadi və strateji əhəmiyyətə, unikal ekoloji sistemə malikdir. O, öz coğrafi vəziyyətilə Rusiya, Azərbaycan, İran, Qazaxıstan və Türkmənistanı birləşdirir", - Dövlət Dumasının spikeri Vyaçeslav Volodin deyib. Onun sözlərinə görə, konvensiyanın imzalanması "diplomatiyanın mühüm nailiyyətidir və iştirakçı ölkələr arasında dost münasibətləri təsdiq edir".

Qeyd edək ki, Azərbaycan və Qazaxıstan parlamentləri Xəzərin statusu haqda Konvensiyanı ratifiksiya ediblər.-02D-