Rusiyanın Azərbaycandakı Səfirliynin qarşısında etiraz aksiyası keçirilib

Bakı/28.04.21/Turan: Bu gün, aprelin 28-də Azərbaycanın 1920-ci il aprelin 28-də XI Qızıl Ordu tərəfindən işğalı günü ilə əlaqədar Xalq Hərəkatının bir qrup fəalı Rusiyanın Azərbaycandakı Səfirliyi qarşısında etiraz aksiyası keçirib.

İştirakçılar “Rusiya ordusu Azərbaycandan çıxarılsın!” tələbi yazılmış plakat qaldırıblar. Polis şüarları iştirakçıların əlindən alıb və onları binadan uzaqlaşdırıb.

“Biz Rus Ordusunun Qarabağdan çıxarılmasını tələb edirik. Onlar sülhməramlı deyil. Biz istəyirik ki, Rusiya Ordusunu Türkiyə Ordusu əvəz etsin”, deyə etirazçılardan biri bildirib.

“Əgər Rusiya Ordusu Şuşaya İsgəndər-M raketi atıbsa, bu ordunu sülhməramlı adlandırmaq olmaz. Yetər artıq, Rusiya Ordusu Azərbaycanı tərfk etməlidir”, deyə digər etirazçı qeyd edib.

Təşkilatçılar kütləvi informasiya vasitələrində qətnamələrini dərc ediblər. Sənəddə deyilir ki, Azərbaycan Xalq Hərəkatı Rusiya Ordusunun ölkəyə gətirilməsini Azərbaycanın müstəqilliyinə qəsd kimi qiymətləndirir.

Bu hərbiçilər Qarabağda sülhməramlı missiyasına aid olmayan xidmətlər göstərir. Bütün bunlar Azərbaycanın maraqlarına ziddir, deyə qətnamədə qeyd edilir.

* Azərbaycan Xalq Hərəkatı 2019-cu il yanvarın 26-da keçmiş daxili işlər naziri İsgəndər Həmidovun təşəbbüsü ilə yaradılıb. Quruma bir sıra siyasi partiyalar, ictimai təşkilatlar və fəallar daxildir. -03-