Rüstəm İbrahimbəyovun prezidentliyə namizədliyi KİV-lərdə necə əks edilir

Bugünkü ölkə mətbuatının aparıcı mövzusu tanınmış ziyalı Rüstəm İbrahimbəyovun ölkənin demokratik düşərgəsinin prezidentliyə vahid namizədi olmasıdır.

Əlbəttə, bu hadisəyə reaksiyalar da eyni deyil. Ölkə mətbuatında bu hadisəni təhlil edən və ona təhqiramiz yanaşan, onu aşağılayan iki qütb var. 

Belə ki, müxalif və müstəqil mətbuat təmsilçiləri bu olayı təhlil edir, ona reaksiyaları əks etdirirlər. Bu sırada “Azadlıq”, “Novoe Vremya”. “Yeni Müsavat”, “Zerkalo” qəzetlərinin yanaşmasını göstərmək olar. Bir sıra qəzetlər bu olaya bir qədər ehtiyatlı yanaşaraq (“Bizim yol” qəzeti) nisbətən arxa plana keçiriblər.

Bu qəzetlərə şərhlərində bir sıra politoloqlar R.İbrahimbəyovun prezidentliyə namizədliyinə “demokratik düşərgəni birləşdirməyə gücü çatan şəxs” təhlili veriblər. 

Rəsmi və iqtidaryönlü qəzetlər (“Azərbaycan”, “Xalq qəzeti”, “Respublika”, “Yeni Azərbaycan”) isə bu məsələyə münasibətdə birbaşa təhqir yolu tutublar. Bu təhqir təkcə R.İbrahimbəyovun vahid namizəd müəyyən olunması ilə bağlı deyil. Müxalifət qüvvələrinin İctimai Palata, ardınca Milli Şura bilrilkləri formalaşandan bu yana bu qəzetlər həmin qurumları, onların aparıcı təmsilçilərini təhqir və aşağılama hədəfi seçiblər. 

Son həftələrdə isə bu təhqir get-gedə “intensivləşirdi”. Hadisələr sürət götürdükcə bu qəzetlərdə təhqirlər də say etibarilə sürətlənirdi. “Yeni Azərbaycan” qəzetində ən az olduqda bu məsələyə dair 3-4 məqalə əksini tapırdı. 

Milli Şura R.İbrahimbəyovu prezidentliyə vahid namizəd elan etdikdən sonra isə quruma və R.İbrahombəyova təhqirlər artıb. YAP-ın rəsmi orqanı olan “Yeni Azərbaycan” qəzeti bu hadisəyə birbaşa və dolayısı ilə 3 iyul 2013-cü il sayında 6 məqalə yerləşdirməklə “xüsusi diqqət” yetirib. Rəsmi “Azərbaycan”, “Xalq qəzeti” və “Respublika” qəzetləri bu mövzuya az yazı həsr etsələr də mövqe “Yeni Azərbaycan” qəzetilə üst-üstə düşüb. Bir sıra şərhçilər bu münasibəti mətbuat orqanlarının öz mövqeyi yox, bu hadisəyə rəsmi Bakının mövqeyinin ifadəsi kimi şərh edirlər.   

Saytların çoxu R.İbrahimbəyovun prezidentliyə namizədliyini xəbər şəklində qaydasında yerləşdirib. Bu hadisəyə hər hansı hər hansı müəllif yazısı həsr olunmayıb. Bir sıra saytlarda (moderator, modern, qafqaz, avropa, vesti)  bu hadisəyə iqtidar düşərgəsi mənsublarının şərhləri, açıqlamaları geniş yer alır.-05D-