SAMA: Zaur Qurbanlı ictimai və blogerlik fəaliyyətinə görə həbs edilib

SAMA son zamanlar müxalif gənc fəalların həbslərinin davam etməsindən narahatlığını ifadə edir.

Belə ki, Müsavat Partiyasının gənclər təşkilatının üzvü Nigar Yaqublunun həbsindən sonra sentyabrın 29-da NİDA vətəndaş hərəkatının üzvü, bloger Z.Qurbanlı DİN-in Mütəşəkkil Cinayətkarlığa qarşı Mübarizə İdarəsinin əməkdaşları tərəfindən saxlanılıb. 

Onu saxlayan şəxslər heç bir sənəd və hal şahidləri olmadan evdə axtarış aparıblar.  Evdə axtarış aparılan zaman orada heç kim olmayıb və axtarış haqda  Z.Qurbanlının valideynlərinə məlumat verilməyib.  Sonra axtarış Müsbət Dəyişiklik Hərəkatının (MDH) ofisində davam etdirilib. Evdən Z.Qurbanlıya məxsus bir ədəd kompüter, MDH-dən isə NİDA Vətəndaş Hərəkatına məxsus çap materialları götürülüb. Oktyabrın 1-də DİN-nın mətbuat xidmətinin şöbə rəisi Orxan Mansurzadə bildirib ki, Z.Qurbanlı narkotik vasitələrin qanunsuz dövriyyəsi ilə əlaqədar daxil olan əməliyyat məlumatı əsasında saxlanılarkən polis əməkdaşlarına müqavimət göstərib. Xidməti vəzifələrini yerinə yetirən polis əməkdaşlarının qanuni tələblərinə qəsdən tabe olmadığına görə onun barəsində Abşeron Rayon Məhkəməsi tərəfindən İnzibati Xətalar Məcəlləsinin 310.1-ci maddəsinin tələblərinə əsasən 15 gün müddətinə inzibati həbs qərarı çıxarılıb. Nazirliyin rəsmisi deyib ki, Z.Qurbanlının iş yerində aparılan axtarış zamanı qanunsuz sənədlər və digər əşyalar aşkar edilərək götürülüb. 

Qurbanlı vəkilsiz məhkəmə qarşısına çıxarılıb, bundan başqa, 2 gün ərzində onun saxlandığı yer barədə doğmalarına məlumat verilməyib.

Alyans hesab edir ki, Qurbanlının həbsi onun ictimai və bloggerlik fəaliyyəti ilə bağlıdır və siyasi motivlidir.

SAMA Z.Qurbanlının həbsini hakimiyyətin gənc fəallara qarşı təzyiq və təqiblərin davamı kimi qiymətləndirir.

SAMA hakimiyyəti gənc fəallara qarşı təzyiq və təqiblərə son qoymağa, həbsdə olan gənc fəalları azadlığa buraxmağa çağırır. -06D-