Şamaxıda stadion tikilib, bəəs şəhərdə futbol klubu olacaq?

Bakı/02.11.21/Turan: Dünən Bakıdan 100 km qərbdə yerləşən Şamaxı şəhərində Azərbaycan prezidenti İlham Əliyevin iştirakı ilə futbol stadionunun açılışı keçirilib.

2200 azarkeş tutumu olan Şamaxı şəhər stadionu UEFA-nın ikinci kateqoriyalı sertifikatına malik olacaq. Bu isə stadionda beynəlxalq oyunların keçirilməsi üçün bütün imkanların olmasından qaynaqlanır. UEFA klub yarışlarının 1-ci, 2-ci və 3-cü təsnifat mərhələsinin, eyni zamanda, milli komandadan başqa, bütün yaş qruplarına aid milli komandaların oyunları bu stadionda keçirilə bilər. Bu barədə AFFA-nın (Azərbaycan Futbol Federasiyaları Assosiasiyası) rəsmi məlumatında deyilir.

Bu stadionun inşası üçün maliyyə vəsaitinin 87 faizi UEFA, 13 faizi isə AFFA tərəfindən təmin olunub. 

Stadionun ərazisindəki idman kompleksində cüdo və güləş növləri ilə məşğul olmaq üçün zal, həmçinin fitnes-zalı inşa edilib. Bundan əlavə, stadionun ərazisində süni örtüklü iki mini-meydança yaradılıb və bu meydançaların 300 nəfər azarkeş tutumuna malik tribunası var.

Müasir stadionun tikilməsindən sonra əsrlər boyunca Azərbaycan Şirvanşahlar dövlətinin paytaxtı olan Şamaxının, nəhayət, öz peşəkar futbol klubunun da yaradılacağına ümid etmək qalır. -06D-