Sarkisyan görüşün yekunlarından məmnundur, Əliyev hələlik fikir bildirməyib

Bakı/17.10.17/Turan: Bazar ertəsi Cenevrədə Azərbaycan və Ermənistan prezidentlərinin görüşü başa çatdıqdan bir neçə dəqiqə sonra Serj Sarkisyan danışıqların yekunları ilə bağlı bəyanat verib.

İsveçrədə erməni icmasının nümayəndələri qarşısında çıxış edən prezident deyib ki, problemin həlli variantları haqqında hər hansı konkret razılıq əldə olunmayıb.

"Amma biz ön cəbhədə insan tələfatından qaçmaq üçün gərginliyin daha da azaldılması istiqamətində tədbirlər görmək barədə razılığa gəldik. Qeyd etməliyəm ki, Azərbaycan prezidenti də, mən də bunda çox maraqlıyıq", deyə Sarkisyan bildirib.

Daha sonra o, Əliyevin davranışı ilə bağlı şərh verməyə başlayıb, vəziyyətin dəyişə biləcəyinə işarə edib.

"Kaş ki, o, həmişə belə düşünsün. O da problemin mürəkkəbliyini çox yaxşı başa düşür, təbii ki, mən də, amma problem elədir ki, asan həll yolu heç vaxt olmayacaq", deyə Ermənistan prezidenti qeyd edib.

Amma daha sonra o, yalnız vəziyyəti gərginləşdirə biləcək kifayət qədər dəqiq bəyanat səsləndirib.

"İstəyirəm ki, hamı əmin olsun: bizim üçün Qarabağın təhlükəsizliyini hər hansı şəklidə poza biləcək bir həll yoxdur. Bizim üçün yeganə həll Qarabağın Azərbaycandan ayrı olmasıdır. Heç bir Ermənistan lideri heç vaxt belə bir həlli qəbul edə və həyata keçirə bilməz və biz bunun üçün əlimizdən gələni edəcəyik", deyə o bildirib.

Amma bu qədər sərt mövqe başqa bir məna da verir: Sarkisyan Qarabağ ətrafındakı rayonlarla bağlı heç nə deməyib. Dolayı yolla bu, Ermənistanın, ATƏT-in Minsk Qrupu həmsədrlərinin təklifində də nəzərdə tutulduğu kimi, beş rayonu azad etməyə hazır olduğu, yəni mərhələli nizamlanmanın yenə gündəlikdə olduğu demək ola bilər.

Bu halda yalnız Ermənistan tərəfin nə etməyə hazır olduğu deyil, Bakının hansı güzəştə hazır olduğu da əhəmiyyətlidir.

Görünür, Əliyevin Sarkisyanla görüşdən sonra susqunluğu məhz bununla bağlıdır. Dövlət başçısının Ermənistan prezidenti ilə razılaşacağını ehtimal etmək çətindir, amma susmaq da yaxşı seçim deyil.

Buna görə Əliyevin Cenevrə görüşünün yekunları ilə bağlı ilk bəyanatı böyük əhəmiyyət kəsb edəcək və onu Bakıdan daha çox Yerevanda xüsusi səbrsizliklə gözləyəcəklər. -02B-