Media-icmal 17.10.17

Cenevrə danışıqlarının nəticələri, ərzaq məsullarının qiymət artımı, qanunun aliliyinin necə qorunması bugünki (17 oktyabr, 2017-ci il) medianın aparıcı mövzularındandır...

Ya real danışıqlar, ya hərbi əməliyyatlar

"Azərbaycan" qəzeti "Azərbaycanın hərbi-siyasi üstünlüyü sülh danışıqlarının əsas amilidir" sərlövhəli məqalədə oktyabrın 16-da Cenevrədə keçirilmiş Azərbaycan və Ermənistan prezidentləri İlham Əliyev və Serj Sarkisyanın danışıqlarını (http://www.azerbaijan-news.az/index.php?mod=3&id=131970) dəyərləndirir.

Müəllif deyir ki, artıq Qarabağ münaqişəsinin həllilə bağlı danışıqlar imitasiya mərhələsindən çıxır və buna səbəb Azərbaycan ordusunun 2016-cı il aprelin 4-də keçirdiyi hərbi əməliyyatdır.

Məqalədə vurğulanır ki, Cenevrə görüşü də cəbhə xəttində hərbi əməliyyatların mümkünlüyü ovqatında keçib və müəllifə görə, Ermənistanın kimyəvi tərkibli bombalardan istifadəsi, təmas xəttində Azərbaycan mülki vətəndaşlarını qətlə yetirməsi aprel hadisələrinin istənilən vaxt, özü də daha geniş miqyasda təkrarlanacağına zəmin yaradır.

Müəllif deyir ki, ATƏT-in Minsk qrupunun işğalçı tərəfə sərt mövqe sərgiləməməsi bölgədə tərəflərin daha da silahlanmasına səbəb olub.

Müəllif dünənki danışıqlarda prezident İlham Əliyevin aşağıdakı mövqeyi müstəviyə gətirdiyini bildirir: "İlham Əliyev vasitəçilərə sonuncu dəfə seçim imkanı verdi: "Ya Qarabağ ərazisinin işğaldan azad edilməsi üçün real danışıqlara başlanılsın, yaxud bu vəzifə Azərbaycan əsgərinin öhdəsinə buraxılsın!".

Yazı müəllifi xatırladır ki, keçən ilin mayında Vyanada, iyununda Sankt-Peterburqda prezidentlərin görüşü olsa da, bu, nəticəsiz başa çatıb və buna görə məsuliyyəti Ermənistanı hərbi məğlubiyyətdən xilas edən dövlətlər daşıyır.

Müəllif vurğulayır ki, ötən 16 ay ərzindəki vaxt "susqunluq" olub, sülhə doğru bir addım belə atılmayıb və bunu dövlət başçısı belə ifadə edib: "Münaqişə dondurulmayıb və hərbi əməliyyatlar başlasa, vasitəçilərin sülh çağırışları artıq heç bir əhəmiyyət daşımayacaq. Sadə dillə desək, hər hansı bir hərbi gərginlik yaranarsa, onun qarşısını heç bir vasitəçi dövlət ala bilməyəcək və Ermənistanı tam məğlubiyyətdən artıq heç kəs xilas etmək imkanında olmayacaq".

Müəllif deyir ki, İ.Əliyev 1998-ci ildən bu yana iki ölkə rəhbərlərinin 54-cü görüşünə bu mövqe ilə gedib və bundan 31 görüş İ.Əliyevin payına düşür.

Müəllif deyir ki, Ermənistan ilə Azərbaycan arasında qüvvələr nisbəti kəskin dəyişib, Azərbaycan hər bir sahədə böyük üstünlüyə nail olub və bu üstünlüyü əldən verməyəcək, iki ölkə arasında bütün sahələrdə fərq daha da böyüyəcək.

Müəllifə görə, bir mühüm fakt var ki, bu da Azərbaycanın hərbi üstünlüyü, siyasi uğurları və diplomatik qalibiyyətidir ki, sülh danışıqlarının əsas amilidir,

bu amil prosesin istər hərbi, istər siyasi nəticələrini müəyyən edəcək.

Gündəlik qiymət artımı..

"Exo" qəzetində "Azərbaycanda ərzağın qiyməti artır, əhali daha çox xərcləməli olur" (http://ru.echo.az/?p=63594) sərlövhəli məqalə oxumaq olar.

"Ərzaq məhsullarının bahalaşması ilə bağlı gündəlik olaraq "Azad İstelakçılar Birliyi"nə (AİB) 8-ə qədər zəng daxil olur. İnsanları daha çox narahat edən odur ki, qiymtələrin artım meyli davam edir. Əgər əvvəllər şikayətlər elə çox deyildisə də, ət və ət məhsullarının son qiymət sıçrayışından saonra zənglərin sayı daha da artıb". Bunu qəzetə AİB rəhbəri Eyyub Hüseynov belə şərh edir.

E.Hüseynov deyir ki, Azərbaycanda əhalinin bütün gəlirlərinin 70%-i ərzaq alınmasına xərclənir və həm də vurğulayır ki, inkişaf etmiş ölkələrdə bu rəqəm 30%-i keçmir: "Daha yaxşı qidalanmaq istəyən vətəndaş kateqoriyası bütün başqa ehtiyaclarına qənaət etməyə məcbur olur. Mən inanıram ki, bu meyl ilin sonuna kimi davam edəcək və daha bir neçə belə qiymət sıçrayışı olacaq".

AİB rəhbəri hesab edir ki, daha çox bahalaşan ərzaq mallarına alınan ƏDV-in ləğvi, gömrük və vergi dərəcələrinin aşağı salınması ilə hökumət bu qiymət artımının qarşısını ala bilər və deyir ki, bununla bağlı AİB hökumətə sənəd hazırlayır.

Ekspert deyir ki, ərzaq məhsullarının bahalanması ona səbəb olub ki, insanlar bazarlarda daha ucuz məhsul almaq istəyir, bu isə digər problemlərə yol açır: "Bununla bağlı olaraq bazarlarda vaxtı keçmiş məhsullar çoxalıb, buna görə də vətəndaşların AİB-ə şikayətləri artıb. Bununla yanaşı, satışda sənayedə istifadə edilən keyfiyyətsiz yağların olması kimi inaformasiyalar var".

Müəllif 2017-ci il sentyabrın 1-nə ölkədə maaşlar, gəlirlər, maaş artımı və s. barədə danışır və deyir ki, böhran olmasına baxmayaraq, rəsmi rəqəmlər bu ilin yanvar-sentyabr aylarında əhalinin 24,8 milyard manatlıq istehlak malları aldığını və bunun keçən ilin eyni dövrülə müqayisədə 2,1% çox olduğunu bildirir.

Tərəzisi əyilmiş ədalət...

"Novoye Vremya" qəzetində isə diqqəti "Qanunun aliliyini necə təmin etməli?" (http://www.novoye-vremya.com/w108647/.../#.WeTwIWi0PIU) sərlövhəli məqalədə müəllif bu suala cavab axtarır.

Müəllif Məhkəmə-Hüquq Şurasının bu günlərdəki iclasında bəzi məhkəmə sədrləri və hakimləri barədə cəza tədbirləri görüldüyünü bildirir və deyir ki, bu sahədə hələ görülməli iş çoxdur.

Məqalədə xatırladılır ki, həmin iclasda 7 məhkəmə sədri də daxil olmaqla, 20 hakimin səlahiyyətinə xitam verilib, daha 6 məhkəmə sədri daha aşağı vəzifəyə keçirilib.

Müəllif deyir ki, ölkə vətəndaşları daim ədalətli məhkəmə sistemi olmasına ehtiyac duyur, amma bu alınmır: "Məhkəmələrdə, eləcə də digər dövlət instansiyalarında bu ədalətin olmamasıdır ki, bu qurumlardan şikayətlər artıb. Bu şikayətlər Avropa İnsan Haqları Məhkəməsinə yönəldilir. Bu isə onunla bağlıdır ki, bir çox hakimlər üçün qanunun aliliyi prioritet deyil".

Müəllif hesab edir ki, belə hüquqi nihilizm qanunların inkar edilməsi ilə nəticələnir, bu isə öz növbəsində bütünülükdə hüquq sisteminin inkişafını əngəlləyir.

Müəllifə görə, məsələ təkcə məhkəmələrin ədalətli qərar qəbul etməməsilə tamamlanmır, vətəndaşın aylarla, illərlə davam edən müraciətlərinə cavab verilmir, vətəndaşa sayğısızlıq yaşanır.

Məqalə müəllifi siyasi partiyaların, QHT-lərin qeydə alınmasında uzunmüddətli hüquqi süründürməçiliyin davam etdiyini də yada salır və belə sayğısızlıqların insanların ədalət mühakiməsinə inamını sarsıtdığını vurğulayır.

Müəllif deyir ki, qanun qarşısında hamının bərabər olması prinsipi pozulur, belə məsələlərdə ayrı-seçkilik özü yolverilməzdir və bu sahədə ədalətli mühakiməyə və qanunun aliliyinə ancaq belə nail olmaq olar.

Müəllif deyir ki, bundan irəli gələrək, siyasi sifariş yerinə yetirən hakim və məmurlar də qanun qarşısında məsuliyyət daşımalıdır və bu, həm xaricdə, həm də, ən başlıcası, ölkənin daxilində məhkəmə sisteminin xeyrinə olacaq.