Seçki Məcəlləsində nələri dəyişirlər?

Bakı/16.12.17/Turan: Ölkə parlamenti Seçki Məcəlləsinə dəyişikliklər etməyə hazırlaşır. Dəyişiklik təkliflərini Milli Məclisin saytı yayıb.

Layihədə Seçki Məcəlləsinin ümumilikdə 30 dəyişikliyin edilməsi təklif olunur. Bəzi maddələrin dəyişdirilməsi, bəzilərinin isə ümumiyyətlə ləğv olunması istənilir.

Layihədə növbədənkənar prezident seçkilərinin keçirilməsi ilə bağlı məcəllədəki müddəalara təklif olunan dəyişikliklər diqqət çəkir.

Məcəllənin "Növbədənkənar Prezident seçkilərinin keçirilməsi" adlanan 179-cu maddəsinin hazırda qüvvədə olan 1-ci bəndinin mətninə görə, "prezidentin səlahiyyətlərinin icra müddəti Konstitusiyada müəyyən edilən müddət başa çatmamış bitərsə, növbədənkənar Prezident seçkiləri keçirilir".

Təkliflərdə həmin cümlənin aşağıdakı mətndə dəyişdirilməsi istənilir:

"...Prezidentin səlahiyyətlərinin icra müddəti Konstitusiyada müəyyən edilən müddət başa çatmamış bitərsə, "habelə Konstitusiyanın 101-ci maddəsinin I hissəsinin ikinci cümləsinə əsasən Prezidentin elan etdiyi halda növbədənkənar Prezident seçkiləri keçirilir".

Seçki Məcəlləsinin 179.2-ci maddəsinə də oxşar dəyişikliyin edilməsi təklif olunur. Həmin maddənin hazırda qüvvədə olan mətnində deyilir ki, "Konstitusiya Məhkəməsinin və ya Milli Məclisin müvafiq qərarının qəbul edildiyi gündən başlayaraq bir həftədən gec olmayan müddətdə seçkilər MSK tərəfindən çərşənbə gününə təyin edilir və 3 ay ərzində keçirilir".

Təklif olunan variuant isə aşağıdakı kimidir:

"...Konstitusiya Məhkəməsinin və ya Milli Məclisin müvafiq qərarının qəbul edildiyi, Prezident növbədənkənar Prezident seçkilərini elan etdiyi gündən başlayaraq bir həftədən gec olmayan müddətdə seçkilər Mərkəzi Seçki Komissiyası tərəfindən çərşənbə gününə təyin edilir və 3 ay ərzində keçirilir".

Bələdiyyəyə seçilmək istəyənlərə yaş məhdudiyyəti aradan qalxır

Seçki Məcəlləsinə dəyişiklik təklifləri bələdiyyələrə üzv seçilmək istəyənlərə qoyulan yaş tələbinin aradan qaldırılmasını da nəzərdə tutur.

Hazırda məcəllənin "Bələdiyyələrə üzv seçilmək hüququ" adlanan 212-ci maddəsində deyilir ki, seçkilər günü 21 yaşı tamam olan və yaşı 21-dən yuxarı olan və müvafiq seçki dairəsində daimi yaşayan Azərbaycan Respublikasının vətəndaşları bələdiyyələrə üzv seçilə bilərlər.

Həmin cümlənin aşağıdakı variantda dəyişdirilməsi təklif olunur:

"Seçkilərdə iştirak etmək hüququna malik olan və müvafiq seçki dairəsində daimi yaşayan Azərbaycan Respublikasının vətəndaşları bələdiyyələrə üzv seçilə bilərlər".