Azərbaycan öz istehsalı olan zərbəçi pilotsuz uçan aparatları sınaqdan çıxarmağa başlayıb

Bakı/17.12.17/Turan: Azərbaycan kumilyativ başlıqlı pilotsuz uçan aparatların ilk sınaqlarına başlayıb. Bu barədə Azərbaycan müdafiə sənayesi naziri Yavər Camalovun bazar günü rəsmi mətbuatda dərc olunmuş "Azərbaycanın müdafiə sənayesi ən müasir və mükəmməl inkişaf mərhələsində" adlı geniş məqaləsində deyilir.

Onun sözlərinə görə, pilotsuz uçan aparat düşmənin həm canlı qüvvəsini, həm də hərbi texnikasını aşkar etmək və məhv etmək iqtidarında olacaq. Bundan başqa, bir sıra ölkələrlə elektro-impulslu silahın yaradılması üzrə danışıqlar aparılır.

Azərbaycan müxtəlif təyinatlı pilotsuz uçan aparatlar istehsal etmək üçün İsrailin "Aeronavtika" şirkəti ilə Birgə Müəssisə qurub.

Həmçinin, Türkiyənin "Aselsan" şirkəti ilə danışıqlar aparılır və artıq "Alov" zavodunda servis xidmətinin yaradılması haqqında qərar qəbul edilib. "2018-ci ildə biz bir sıra Türkiyə şirkətləri ilə, habelə digər ölkələrin müvafiq qurumları ilə layihələr həyata keçirmək niyyətindəyik", deyə o əlavə edib.

Belə layihələrdən biri 23 millimetr çaplı snayper tüfənginin yaradılması və silahlar arasına daxil edilməsidir. Snayper tüfənginin hədəf məsafəsi 3 min metr təşkil edəcək.

Bununla yanaşı, düşmənin pilotsuz aparatlarını endirmək iqtidarında olan cihazlar hazırlanır. "Eyni zamanda, idarə olunmayan aviasiya bombalarının idarə olunan variantına gətirilməsi ilə bağlı layihələr də həyata keçiriləcək", deyə nazir əlavə edib.-0-