Seçkilər yaxınlaşdıqca namizədlərin dözümsüzlüyü artır

Reportyorların Azadlıq və Təhlükəsizlik İnstitutu (RATİ) seçkilərə 3 ay qalmış prezidentliyə əsas namizədlərinin öz  opponentlərinə qarşı  dözümsüzlük göstərməsindən narahatlıq keçirir.

RATİ-nin bununla bağlı bəyanatında deyilir ki, iyulun 2-də Polis Günü münasibətilə keçirilən tədbirdə prezident İlham Əliyev hakimiyyətin əleyhdarlarını ““satqın, xain və qul psixologiyası”na malik insanlar adlandırıb. 

Bu cür fikirlər hakimiyyətin opponentlərinə qarşı  repressiyaya “yaşıl işıq” yandırmaqla yanaşı İ.Əliyevin ölkə Konstitusiyası ilə  Azərbaycan xalqı qarşısında götürdüyü öhdəliklərlə ziddiyyət təşkil edir.

Həmçinin İ.Əliyevin jurnalistlərə qarşı zorakılıq törədən polis zabitlərinin Mükafatlandırılması narahatlıq doğurur.  Əsasən Səhlab Bağırova general-mayor  və Orxan Axunzadəyə  polkovnik-leytenant rütbəsi verilməsini qeyd etmək olar.

““Jurnalistlərin və dissidentərin susdurulması seçkilərin legitimliyini təhlükə altına sala bilər. Bu cür çıxışlar azad və ədalətli seçki perspektivindən xəbər vermir”, - bəyanatda vurğulanır.

Həmçinin RATİ Milli Şuradan prezidentliyə vahid namizəd Rüstəm İbrahimbəyovun çıxışını pisləyib. Belə ki, R.İbrahimbəyov təxribat, böhtan və yalan  yazanların ağzından vurmaq lazım olduğunu bildirib

Qeyd edək ki, R.İbrahimbəyov “Azadlıq” radiosuna müsahibəsində onun Azərbaycana qayıtması məsələsi ətrafında spekulyasiyadan şikayətlənib. O bildirib ki, “media özü onun haqqında yalan məlumat yayanların ağzından vurmalıdır”.

“Çirkin məqalələri oxuyuram və əgər belə adam ya seçkilərdən sonra, ya ondan əvvəl qarşıma çıxarsa, özüm onun ağzından vuraram və məsuliyyət daşıyaram”, - o vurğulayıb. 

RATİ ictimai xadimlərin, o cümlədən prezidentliyə namizədlərin tənqidə dözümlü olmalarının vacibliyini xatırladıb —06D-