Sem Braunbek: “Hər kəsin dini azadlığı qorunmalıdır”

Vaşinqton/09.06.20/Turan: “ABŞ vicdanlı xidmətdən təxminən 20 il sonra Rəhim Axundovun öz əqidəsinə görə Azərbaycan parlamentindəki vəzifəsindən azad edilməsi barədə məlumatdan narahatdır”, - ABŞ-ın beynəlxalq dini etiqad azadlığı məsələləri üzrə səfiri Sem Braunbek Tvitterdəki hesabında yazıb.

“Din azadlığı hər kəs üçün qorunmalıdır, o cümlədən işə götürülərkən”, -  o, təfərrüatları dəqiqləşdirmədən qeyd edib.

Diplomatik mənbələrin TURAN-ın müxbirinə verdiyi məlumata görə, Vaşinqtonun narahatlığı xristianların Azərbaycanda öz dinlərinə etiqad etdiklərinə görə cəzalandırıla və ya işdən çıxarıla biləcəyi barədə xəbərlərdən qaynaqlanır.

Azərbaycan parlamentinin xarici əlaqələr şöbəsində çalışan 50 yaşlı R.Axundov 2018-ci ildə qanunsuz işdən çıxarılmasına görə keçmiş işəgötürənlərini məhkəməyə verib.

“Bakı İnzibat Məhkəməsinin hakimi Möminat Hacıbəyova işə mahiyyəti üzrə baxmayıb, çünki o, insan hüquqlarının pozulması, parlament tərəfindən mənə göstərilən qorxutma və təzyiq faktlarına məhəl qoymayıb”, - R. Axundov Facebook-da yazıb.

2018-ci ildə yerli KİV bildirmişdi ki, o, dini təzyiqin qurbanı olub ki, bunu TURAN müstəqil olaraq təsdiq edə bilməz. R.Axundovun özü isə bazar ertəsi axşama qədər  hesabatı şərh edə bilməyib.

2018-ci ildə Facebook-dakı statusunda R.Axundov öz işinə işarə etmədən sual vermişdi: “Əgər Azərbaycan Respublikasının vətəndaşları öz dini əqidələrinə görə işdən çıxarılıblarsa, kimə və ya hansı dövlət müəssisəsinə müraciət etməlidirlər? Əgər bu baş verirsə, vətəndaş nə etməlidir? O susmalıdır, yoxsa bu məsələni qaldırmalıdır?

Azərbaycan əhalisinin 96% -i müsəlmandır.

Qalan 4%-ə daxildir: Rus Pravoslav kilsəsi; Gürcü kilsəsi; Erməni kilsəsi; Yeddinci günün adventistləri; molokan; Roma-katolik kilsəsi; yevangelist xristian,  Yehova şahidləri; yəhudilər və bəhailər.

Xristianlar əsasən Bakıda və digər şəhərlərdə yaşayırlar.-0-