Şənbə aksiyasına görə gənc fəallar həbs edildi

Oktyabrın 12-də "Məhsul" stadionunda müxalifətin etiraz aksiyasında iştirak etmiş 4 gənc bazar ertəsi müxtəlif müddətli inzibati həbs cəzasına məhkum edilib.

Xatırladaq ki, oktyabrın 12-də dinc etiraz aksiyası başa çatdıqdan sonra polis mitinqdən gedərkən yolda hökumət əleyhinə şüarlar səsləndirən gənclərə hücum edib, Metronun "İnşaatçılar" stansiyasının yaxınlığında qarşıdurma baş verib. Bu zaman polis bir neçə nəfəri amansızca döyüb. 10-a yaxın şəxs saxlanılıb. Lakin 1 saat sonra onlar sərbəst buraxılıblar.

 Lakin bazar ertəsi saxlanılanlar yenidən Yasamal rayon polis idarəsinə çağırılıblar və oradan Yasamal rayon məhkəməsinə aparılıblar.

 Gənc fəal Türkel Azərtürk və bitərəf Əli Səfərli 15 gün inzibati həbs cəzası alıb. Daha bir AXCP gənc fəalı - Sərvər Abdulla və bitərəf Emin Manıyev 10 gün inzibati həbs cəzasına məhkum edilib.  

İki bitərəf - Anar Əkbərov və Orxan Baxışlı müvafiq olaraq 100 və 50 manat cərimə olunub. Xəbəri AXCP yayıb. 

 Demokratik Qüvvələrin Milli Şurasından prezidentliyə namizəd Cəmil Həsənli gənclərə qarşı polis zorakılığını pisləyib və bunu gəncləri qorxutmaq və etiraz aksiyalarında iştirakdan çəkindirmək məqsədilə qəsdən törədilmiş təxribat kimi qiymətləndirib.

Maraqlıdır ki, şənbə günü axşam paytaxt polisi aksiyanın ciddi ictimai asayiş pozuntuları olmadan keçdiyini bəyan edib. -0-