Separatçılar Laçın və Ağdamdan keçən yolların eyni vaxtda istifadəsi ilə barışıblar

Bakı/17.09.23/Turan: Qarabağ separatçıları “humanitar yüklərin” Beynəlxalq Qırmızı Xaç Komitəsinin  (BQXK) maşınları ilə eyni vaxtda Laçın və Ağdam-Xankəndi yolu daşınması ilə bağlı  BQXK-nın və Rusiya sülhməramlı kontingentinin komandanlığının birgə təklifini qəbul etmək qərarına gəliblər. Bu barədə separatçı rejimin qondarma “informasiya qərargahı” məlumat yayıb.

Həmin mənbəyə görə, “vasitəçilər gərgin humanitar və təhlükəsizlik vəziyyətini yumşaltmaq məqsədi ilə» Qarabağ ermənilərinin nümayəndələri ilə Azərbaycan hakimiyyəti arasında görüş təşkil etməyə çalışırlar.

Qeyd edək ki, Laçın və Ağdam-Xankəndidən keçən yolların eyni vaxtda istifadəsi təklifi Azərbaycan hakimiyyəti tərəfindən  hələ bir ay əvvəl irəli sürülüb. Lakin Ermənistan və separatçılar indiyədək bu təklifi inadla rədd edərək, kənar oyunçulara müraciət edərək Bakıya təzyiq etməyə çalışıblar.

Rəsmi Bakı son ay yarım ərzində Qarabağ ermənilərinə ən azı 3 dəfə Azərbaycan ərazisində görüş təklif edib. Lakin bu təklif qəti şəkildə ermənilət tərədindən  rədd edilirdi.  Amma görünür Bakıya beynəlxalq təzyiqlərin göstərilməsinə  nail ola bilməyən ermənilər indi Azərbaycanın təkliflərini qəbul etmək  məcburiyyətində qalıblar.–06c-