Sərdar Cəlaloğlu saytları məhkəməyə verməyi qərara alıb

Bakı/11.06.18/Turan: Demokrat Partiyasının lideri, keçmiş prezidentliyə namizəd Sərdar Cəlaloğlu birdən-birə altı saytı: big.az, olke.az, oxu.az, report.az, qaynar.info və modern.az saytlarını məhkəməyə verir. Səbəb bədnam və təhqir edici materialların dərc edilməsidir.

"Saytlar məni təhqir edir, elmi fəaliyyətimi şübhə altına qoyur. Onlar yazırlar ki, guya Londonda villam var, məni xaricdən maliyyələşdirirlər, oğlum isə orduda xidmət etməkdən yayınır.

Məhkəməyə müraciət edəcəyəm və nəşrlərin müəlliflərinin öz iddialarını sübut etməsini tələb edəcəyəm", deyə Cəlaloğlu Turan agentliyinə bildirib.

Onun sözlərinə görə, onun nüfuzdan salınması kampaniyası qohumlarının 2016-cı il aprel döyüşlərində həlak olan qardaşı oğlu üçün ev tikməsindən sonra başlayıb.

"Qardaşım oğlunun dul qadını, 3 və 5 yaşlarında qızlarının yaşaması üçün Bakının Ramanı qəsəbəsində 2 sot torpaq sahəsində balaca bir ev tikmişik. Evin həyətində hasarı 2-3 daş yuxarı qaldırdıq ki, həyət görünməsin. SOCAR-ın işçiləri gəlib divarları uçurub. Biz də SOCAR-ın prezidentinə müraciət etdik ki, bu şəhid ailəsidir, prezidentin, birinci vitse-prezidentin şəhid ailələrinə böyük qayğısı var. Bunların villalalrı yoxdur ki, kiçik bir evdir, niyə uçurursunuz, uşqaları qorxudursunuz? SOCAR-dan mənə deyirlər, hansısa idarəyə gedib icazə alınmalıdır. Bura SOCAR-ın ərazisidir", deyə o qeyd edib.

Keçmiş namizəd adlarını sadaladığı saytalarda təhqir edilməsini Prezident Adminstrasiyasının media ilə bağlı müvafiq şöbəsi və SOCAR tərəfindən təşkil edildiyini iddia edir. -03B-