Sergey Lavrov: �Ermənistan və Azərbaycan saxlanılan şəxslərin mübadiləsini hazırlayır�

Bakı/02.10.19/Turan: Dağlıq Qarabağ ətrafındakı vəziyyətin nizamlanması üzrə siyasi proses dayanıb, hələlik bu istiqamətdə irəliləmək mümkün deyil. Bunu Rusiyanın xarici işlər naziri Sergey Lavrov çərşənbə günü "Valday" beynəlxalq diskussiya klubunun XVI illik toplantısındakı çıxışı zamanı deyib.

"Dağlıq Qarabağa gəlincə, son vaxtlar təmas xəttində vəziyyət çox sakitdir, insident azdır və böyük deyil. Ölənlərin cəsədlərinin mübadiləsi oldu, saxlanılan şəxslərin mübadiləsi hazırlanır", -TASS S.Lavrovdan sitat gətirib.

Onun sözlərinə görə, münaqişə zonasında vəziyyət "bir il əvvəlkindən daha sakitdir, lakin siyasi proses dayanıb və hələlik bu durumdan çıxmaq mümkün deyil", - o deyib.

"Əlaqələr var, amma nizamlanma ilə bağlı dialoq hələ bərpa edilməyib. Ancaq mən burada hansısa böyük hərəkətlərin yenidən başlaması üçün açıq təhlükə görmürəm", - S.Lavrov deyib və qeyd edib ki, Rusiya bunun baş verməməsi üçün əlindən gələni edəcək.

Qeyd edək ki, Ermənistanda saxlanılan şəxslər əslən Kəlbəcərdən olan Dilqəm Əsgərov və Şahbaz Quliyevdir. Erməni tərəfi onları Azərbaycanda saxlanılan erməni hərbçilərə dəyişməkdən qəti şəkildə imtina edir. -02D-