Sərhəddə Azərbaycan və Ermənistan nümayəndələrinin görüşü /YENİLƏNİB/

Bakı/01.04.23/Turan:  Ermənistan-Azərbaycan sərhədində iki ölkənin nümayəndələri görüşüb.

"Teh-Kornidzor sahəsində Ermənistan və Azərbaycan nümayəndələrinin iştirakı ilə görüş olub, sərhədin dəqiqləşdirilməsi üzrə işlər aparılıb, nəticədə bu sahədə vəziyyət xeyli yaxşılaşıb. Hazırda işlər davam edir, nəticələr  barədə ictimaiyyətə əlavə məlumat veriləcək", - Ermənistan Milli Təhlükəsizlik Xidməti bildirib.

Azərbaycan tərəfi hələlik görüş barədə rəsmi məlumat verməyib.

Qeyd edək ki, martın 30-da Azərbaycan ordusu sözügedən istiqamətdə bir sıra yüksəklikləri tutub, mövqeləri təchiz edib və Ermənistanla şərti sərhəd sahəsini nəzarətə götürüb. İndiyədək Azərbaycanın hərbi mövqeləri müəyyən məsafədə idi, çünki bu istiqamətdə erməni tərəfi Texdən Laçın dəhlizinin yeni trasına  (2022-ci ilin avqustunda istismara verilib) qədər olan yoldan istifadəyə davam edirdi.

Hazırda Ermənistan Kornidzor kəndindən bu magistrala gedən yolun özünə aid hissəsini tikib.- 06B

* * *

Öz növbəsində, "Hraparak" qəzeti baş verənlərin başqa versiyasını bildirib.

Belə ki, yerli mənbələrin məlumatına görə, sərhəddə danışıqlar Rusiya sülhməramlılarının nümayəndələrinin iştirakı ilə aparılıb.

Ermənistan tərəfdən danışıqları Təhlükəsizlik Xidmətinin direktoru Armen Abazyan aparıb. O, azərbaycanlıları bu günlərdə tutduqları mövqelərdən Dostluq abidəsinə qədər geri çəkilməyə razı salmağa çalışıb. Lakin danışıqlar nəticə verməyib və azərbaycanlılar öz mövqelərində qalıblar.

Bundan əlavə, Azərbaycan və Ermənistan hərbçiləri arasında dava olub. -0-