“Şərq tərəfdaşlığı” ölkələrinin 33 jurnalist təşkilatı Avropa İttifaqı, Avropa Şurası və ATƏT-dən dəstək istəyir

Bakı/08.05.20/Turan: “Şərq tərəfdaşlığı” proqramı ölkələrinin (Azərbaycan, Ermənistan, Belarus, Gürcüstan, Moldova, Ukrayna) 33 jurnalist təşkilatı Avropa İttifaqı, Avropa Komissiyası, Avropa Şurası və ATƏT rəhbərliyinə müraciət edib.

Kollektiv məktubda COVID-19 pandemiyası və “milli hökumətlərin KİV azadlığını məhdudlaşdıran siyasət”i fonunda regionda KİV və jurnalistlərə dövlət və beynəlxalq dəstəyin yetərincə olmamasından  “dərin narahatlıq” ifadə olunur.

 Müraciətdə deyilir ki, 2020-ci ildə 3 May Ümumdünya Mətbuat Azadlığı Gününün qeyd edilməsi “Şərq tərəfdaşlığı” ölkələrinin və onların şimal və cənub regionlardakı qonşularının iqtisadiyyatına və KİV azadlığına ağır zərbə vuran COVID-19 qlobal böhranı ilə üst-üstə düşüb.

“Saxta xəbərlər (o cümlədən Covid-19 haqda)  yayan Rusiyayönlü KİV-lərlə rəqabət etmək məcburiyyətində qalan kiçik müstəqil mediaya daha çox ziyan dəyib.

Milli hökumətlər COVID-19 böhranından KİV azadlığının daha da məhdudlaşdırılması üçün bəhanə kimi istifadə ediblər. Ermənistan, Moldova və Gürcüstanda məlumatlara açıq çatımlılıq məhdudlaşdırılıb, Azərbaycan və Belarusda jurnalistlər və vətəndaş fəalları açıq şəkildə təqib olunur, Ukraynada isə jurnalistlərin hüquqları qorunmur.

“Biz sizi siyasi dialoqa dəstəyinizi məhdudlaşdırmamağa, KİV-in inkişafı ilə bağlı aşağıdakı istiqamətlərdə tədbirlər görməyə çağırırıq:

-Pandemiya böhranının səbəb olduğu zərərin ödənilməs üçün əlavə maliyyə vəsaitinin ayrılması. Müstəqil KİV üçün xarici qrant dəstəyinin təmin edilməsi, bunun qadağan olunduğu ölkələrdə xarici qrantların alınmasına qoyulan qadağanın ləğvinə nail olunmaq;

- auditoriyanın ehtiyaclarının araşdırılması və media biznesin aparılması üçün maliyyə və dəstəyin təmin edilməsi;

- Media savadlılığının artırılması, dezinformasiyaya qarşı mübarizə aparmaq üçün regional təşəbbüslərə dəstəyin genişləndirilməsi, əhalinin tənqidi düşüncəsinin stimullaşdırılması.

Azərbaycandan müraciəti imzalayanlar: Bakı Mətbuat Klubu, Nəcəf Nəcəfov Fondu; Yayımların Monitorinq Mərkəzi; İnternyus-Azərbaycan; Azərbaycan Jurnalistlər Birliyi, Yeni Nəsil.-02В-