Hüquq və Azadlıqların Müdafiəsi İnstitutu Əfqan Sadıqovun üçüncü ölkəyə getməsinə qadağa qoyulmasına dair bəyanatı

Tbilisidə yerləşən Hüquq və Azadlıqların Müdafiəsi İnstitutu Azərbaycanın Azel.tv saytının təsisçisi Əfqan Sadıqovun üçüncü ölkələrə getməsinə qadağa qoyulması ilə əlaqədar bəyanat yayıb.

2018-ci ildə bir qrup azərbaycanlı siyasi mühacir tərəfindən təsis edilmiş təşkilatın bəyanatında qeyd edilir ki, Sadıqov Azərbaycanda hüquq müdafiəçilərinə, jurnalistlərə, siyasətçilərə və tənqidçi fəallara qarşı repressiyalara görə 2023-cü ildə ailəsi ilə birlikdə müvəqqəti olaraq Gürcüstan Respublikasına köçüb.

"Bir müddət sonra onun ailəsi Azərbaycana qayıdıb və Azərbaycana qayıtdıqdan sonra Əfqan Sadıqovun həyat yoldaşı Azərbaycan polisi tərəfindən bir sıra təqiblərə məruz qalıb. Sevinc Sadıqova ölkədəki təqiblərdən yayınaraq yenidən Gürcüstan Respublikasına qayıdıb", deyə sənəddə bildirilir.

İyulun 17-də Sadıqovlar ailəsi birlikdə Gürcüstandan üçüncü ölkəyə keçmək istəyəndə Əfqan Sadıqov Tbilisi hava limanında Dövlət Sərhəd Xidməti tərəfindən saxlanılıb və ona Azərbaycandan başqa ölkələrə keçə bilməyəcəyi bildirilib.   

Onun üçüncü ölkəyə çıxışına maneə yaradılması sərbəst hərəkət azadlığının məhdudlaşdırılması və beynəlxalq hüquqi normaların pozuntusu kimi qiymətləndirilir.

"Qeyd edək ki, 2017-ci ildən sonra Gürcüstanda müvəqqəti yaşayan və sığınan azərbaycanlı fəallar bir sıra təqiblər və eləcə də hadisələrlə üzləşməkdədir", deyə bəyanatda bildirilir. 

2017-ci ildə "Azərbaycan Xalq Cəbhəsinin Partiyasının" sədr müavini Gözəl Bayramlı Azərbaycana qayıdarkən həbs olunub.

2017-ci ildə ictimai-siyasi fəal Mehman Qələndərov Azərbaycana qayıdarkən həbs olunub və həbsxanada intihar etdiyi bəyan edilib.

2017-ci ildə Jurnalist Əfqan Muxtarlı Tbilisidə başına torba keçirilməklə Azərbaycana göndərilib.

2018-ci ildə siyasi fəal Daşqın Ağalarlının siyasi sığınacaq statusu ləğv edilərək Gürcüstanı tərk etməyi tələb edilib.

2019-ci ildə insan haqları müdafiəçisi, Hüquq və Azadlıqların Müdafiəsi İnstitutunun rəhbəri Avtandil Məmmədov təqiblərlə üzləşib, Gürcüstan Daxili İşlər Nazirliyi tərəfindən saxlanılaraq, Azərbaycana ekstraditsiyasına cəhd göstərilib.

2021-ci ildə Gürcüstandan sığınacaq istəyən bloger Hüseyn Bakıxanovun Tbilisidəki Stamba otelində intihar etdiyi bəyan edilib.

2023-ci ildə Jurnalist Elməddin Şamilzadə Tbilisidə naməlum şəxslər tərəfindən hücuma məruz qalıb.

2023-cü ilin oktyabrında ölkədə təqiblərdən xilas olmaq üçün qısa müddətə Gürcüstan Respublikasına gələn Müstəqil Reportyorlar Komitəsinin digər əməkdaşı, jurnalist Bəhruz Əliyevin avtomobillə vurulmaqla həyatına qarşı sui-qəsdə cəhd edilib.