Siyavuş Novruzovu vəzifəsindən kənarlaşdırıblar

Bakı/24.08.20/Turan: Xəyanətkarlar və qorxaqlar hər zaman və hər yerdə var. Onların necə çabaladığını görmək ayrıca zövq verir. 

Bu günün qəhrəmanı Siyavuş Novruzov da siyasi xarakiri törətdi.   Hakim Yeni Azərbaycan Partiyası S.Novruzovun “öz xahişilə” sədr müavini postunu tərk etdiyini bildirib.

Amma bundan öncə ictimaiyyət onun keçmiş şefi Ramiz Mehdiyev tərəfindən aldadıcı yolla toya cəlb olunduğuna dair səs-küylü bəyanat verərək özünü xilas etməyə çalışdığını gördü.

O, Facebook səhifəsində karantin rejimini pozduğunu, buna görə töhmət aldığını, xanımı, ombudsman Səbinə Əliyeva ilə birlikdə 400 manat cərimələndiyini bildirib. Bundan sonra isə hücuma keçib: “Mən Ramiz Mehdiyevin dəvət zəngi zamanı möhtərəm prezident İlham Əliyevin adını çəkdiyinə görə toyda iştirak təklifini tərəddüdsüz qəbul etmişəm və sözügedən mərasimdə ailəlikcə iştirak etmişik. Yalnız bir gün sonra məlum olub ki, Ramiz Mehdiyev bizə səhv məlumat verib”, - S.Novruzov bildirib.

“Hətta məclis zamanı Ramiz Mehdiyev bildirdi ki,  “prezident İlham Əliyev bu gün səhər zəng edərək yeni evlənənlərə təbriklərini və xoş arzularını çatdırıb”. Belə məlum oldu ki, bu, həqiqət deyil və bizi aldadıblar”, - S.Novruzov  yazır.

Bu kompromatla sakitləşməyən S.Novruzov davam edib: “Onu da qeyd etmək istəyirəm ki, Ramiz Mehdiyevin uzun illər ərzində fəaliyyəti zamanı onunla münasibətlərimiz kifayət qədər soyuq olub. Mənim bütün fəaliyyətim boyu karyera inkişafım sırf ümummilli lider Heydər Əliyevin və onun layiqli davamçısı olan İlham Əliyevin adı ilə bağlıdır. Ramiz Mehdiyevin isə mənim siyasi fəaliyyətimdə və karyeramda hər hansı bir rolu olmayıb, hətta bəzi məsələlərdə qarşımı kəsib”.

Bu da YAPsayağı xəyanətkarlıq..0-