Soçidə prezidentlər İlham Əliyev ilə Vladimir Putinin görüşü

Bakı/03.10.19/Turan: Oktyabrın 3-də Soçidə Rusiya və Azərbaycan prezidentlərinin görüşü olub. Vladimir Putin və İlham Əliyev ticarət-iqtisadi əlaqələrin inkişafı məsələlərini müzakirə ediblər.

"Şəxsi əlaqələrimizdə fasilənin olmasına baxmayaraq, ölkələrimiz arasındakı münasibətlər inkişaf etməkdə davam edib və uğurla inkişaf edir. Ticarət- iqtisadi əlaqələr möhkəmlənir, ötən il əmtəə dövriyyəsi 2,5 milyard dollar təşkil edib", - RİA-Novosti V.Putindən sitat gətirib.

Onun fikrincə, ölkələrin bu istiqamətdə yaxşı perspektivləri var. "Mən Azərbaycan prezidentinin müəllifi olduğu planları nəzərdə tuturam. Biz də öz tərəfimizdən bu konkret iri layihələrin həyata keçirilməsi üçün əlimizdən gələni edirik", - V.Putin əlavə edib.

"Digər istiqmətlərdə əlaqələrin necə inkişaf etdiyinə dair məlumat mübadiləsi etməliyik. Ümid edirəm ki, bu gün buna nail olacağıq və siz maraqlı ümumi müzakirədə iştirak edəcəksiniz", - Rusiya qeyd edib.

İ.Əliyev görüşə görə rusiyalı liderə təşəkkürünü bildirib.

"Qeyd etdiyiniz kimi, biz bir müddət, daha dəqiq desək, dörd ay görüşmədik. Ötənilki əlaqələrimizin intensivliyini nəzərə alsaq bu, çox uzun müddətdir", - o deyib və xatırladıb ki, bir il öncə dörd görüş keçirilib.

İ.Əliyev Rusiya-Azərbaycan münasibətlərini strateji tərəfdaşlıq münasibətləri kimi xarakterizə edib və iqtisadi sahədəki müsbət dinamikanı qeyd edib.

"Əmtəə dövriyyəsi həm ötən il, həm də bu il artır. Bizim məlumata görə, bu il əmtəə dövriyyəsində artım 20% -dən çox olub", - o deyib.

"Bizim üçün Rusiya mühüm tərəfdaş, dost, yaxşı qonşudur. Biz bu münasibətləri qiymətləndiririk. Əminəm ki, bugünkü müzakirə əlaqələrimizin daha da möhkəmlənməsinə yaxşı töhfə olacaq", - İ.Əliyev vurğulayıb.-02D-