Son 30 ildə ABŞ Azərbaycanda ərazilərin minalardan təmizlənməsi üzrə humanitar proqramlara 35 milyon ayırıb

Bakı/29.11.23/Turan: 1993-cü ildən ABŞ Azərbaycanda ərazilərin minalardan təmizlənməsi humanitar proqramlarına dəstək olaraq 35 milyon dollardan çox vəsait yönəldib. Bu barədə Bakıda Minalardan Təmizləmə üzrə 2-ci Beynəlxalq Seminarda iştirakla bağlı ABŞ səfirliyinin X platformasındakı məlumatında deyilir.

“Biz minalar və partlamamış hərbi sursatlardan həlak olanlara və onların ailələrinə başsağlığı veririk”, - qeyd olunur.

Öz növbəsində Birləşmiş Millətlər Təşkilatı İnkişaf Agentiyinin Azərbaycandakı ofisi bildirib ki, noyabrın 28-də Bakıda Azərbaycan Minatəmizləmə Agentliyi (ANAMA), Avropa İttifaqı, BMTİP nümayəndələri və digər rəsmi şəxslərin iştirakı ilə keçirilən mərasimdə beynəlxalq minatəmizləmə standartlarına uyğun olaraq, altıhəftəlik təlimləri uğurla başa vuran 18 qadın minatəmizləyiciyə akkreditasiya sertifikatları təqdim edilib.

“Mina Məsləhət Qrupunun beynəlxalq ekspertləri tərəfindən keçilən nəzəri və praktiki təlimlər vasitəsilə qadın minatəmizləyici qruplar minaların və partlamamış hərbi sursatların təsbit edilərək aşkarlanması və işarələnməsi üçün əsas biliklərə, zəruri bacarıqlara, tələb olunan davranış və ilk yardımın göstərilməsi qaydalarına yiyələnib. 24 nəfərdən ibarət 2 minalardan təmizləmə qrupu, o cümlədən 18 minatəmizləyici, 2 səhiyyə işçisi, 2 qrup rəhbəri və 2 qrup rəhbəri müavini akkreditasiyadan keçib. Eyni zamanda, layihə çərçivəsində 12 xüsusi minatəmizləyici siçovul və 8 minatəmizləyici it təlim keçib”, - məlumatda qeyd edilir.

İlk qadın minatəmizləyici qruplar üçün təlimlər Avropa İttifaqının maliyyələşdirdiyi və BMTİP-nin Beynəlxalq Avrasiya Mətbuat Fondu (IEPF) və Mina Məsləhət Qrupu ilə tərəfdaşlıq çərçivəsində həyata keçirdiyi “ANAMA-nın potensialının artırılması ilə məcburi köçkünlərin təhlükəsiz geri qayıtmasının dəstəklənməsi" layihəsi çərçivəsində təşkil edilib. —03B06-