Spikerin xarici səfərlərə pulu çatmır

Azərbaycan parlamentinin 2017-ci il üçün büdcəsi 23 mln. 89 min 714 manat həcmində nəzərdə tutulub. Bu, bu ildə olduğundan 394 min 784 manat çoxdur. Bu barədə Milli Məclisin işlər müdiri Firudun Hacıyev 2017-ci il üçün dövlət büdcəsi layihəsinin müzakirəsində bildirib.

Qeyd edək ki, sözügedən məbləğin 74,5%-i (23 mln. manat) deputatların əməkhaqqı fondunu təşkil edir.

Ezamiyyə xərcləri ötənilki səviyyədə saxlanılıb -  1 mln. 110 min manat.

Avronest Parlament Assambleyasında nümayəndə heyətinin tam tərkibdə iştirakının bərpa olunması ilə əlaqədar rəsmi səfərlərin çoxalmasını nəzərə alaraq 2017-ci ilin xərclər smetasında ezamiyyə xərclərinə 300 min manat əlavə vəsaitin ayrılması təklif edilib.

Bundan başqa inventarların alınmasına 200 min manat, avadanlıqların alınmasına  50 min manat, digər alış və xidmətlərə görə 100 min manat,  digər maşın və avadanlıqlara isə 200 min manat əlavə vəsaitin ayrılması təklif edilib.

Bundan əlavə, parlament Maliyyə Nazirliyindən xahiş edib ki, devalvasiyanı nəzərə alaraq 2016-cı ilin ezamiyyə xərclərinə 140 min manat əlavə olunsun.

Spiker Oqtay Əsədov F.Hacıyevin parlamentin büdcəsinin artırılmasının vacibliyini necə əsaslandırması  ilə bağlı narazılığını bildirib.

“394 min manat artım heç elektrik enerjisinin ödənilməsinə çatmır”, - spiker deyib və xatırladıb ki, ötənilki büdcədən sonra iki devalvasiya olub.

“Dövlət strukturları arasında ən çox ezamiyyə parlamentin payına düşür. Mən baş nazirə və maliyyə nazirinə müraciət etmişəm ki, xarici ezamiyyələr faktını nəzərə alsınlar. Çünki əgər deputatlar beynəlxalq təşkilatlarda iştirak etməsələr işlərdə geriləmə olacaq”, - O.Əsədov vurğulayıb.–71D-