Strasburqda İqbal Əbilova dəstək aksiyası

Yanvarın 27-də Strasburqda Azərbaycanda həbs edilmiş tədqiqatçı İqbal Əbilova dəstək aksiyası keçirilib.

Aksiya Avropa Şurası Parlament Assambleyasının qış sessiyasının açılması ilə əlaqədar gənc alimin dostları və həmkarları tərəfindən təşkil olunub. AŞPA-nın gündəliyində Azərbaycanda insan hüquq və azadlıqları da daxil olmaqla, aktual məsələlər var.

"Aksiyanın məqsədi 2024-cü ilin iyulunda siyasi motivlə saxlanılmış İqbal Əbilovun ədalətsiz həbsinə diqqət cəlb etməkdir", deyə aksiya təşkilatçılarının məlumatında bildirilir.

İştirakçılar Əbilovu azad etmək və Azərbaycanda insan hüquqlarına və akademik azadlıqlara hörmət etmək çağırışları yer alan plakat və bannerlər açıblar.

Aksiya təşkilatçıları Əbilovun azad edilməsi məqsədilə beynəlxalq təzyiqin artacağına ümid etdiklərini bildiriblər və Avropa Şurasını bu məsələdə möhkəm mövqe tutmağa çağırıblar. 

* İqbal Əbilov 22 iyul 2024-cü il tarixində dövlətə xəyanət, xarici təşkilatların tapşırığı ilə dövlət əleyhinə çağırışlar, milli və dini ayrı-seçkilik salmaq ittihamları ilə saxlanılıb. Bütün bu cinayətlərin Ermənistan xüsusi xidmətlərinin göstərişi ilə törədildiyi iddia olunur.

Əbilov ittihamları təkzib edir və müstəsna olaraq elmi fəaliyyətlə məşğul olduğunu bildirir. Dünyanın müxtəlif ölkələrindən olan alimlərdən ibarət böyük bir qrup Əbilovun azad edilməsinə köməklik etmək xahişi ilə Azərbaycan rəhbərliyinə müraciət edib. Hüquq müdafiəçiləri Əbilovu siyasi məhbus kimi tanıyıblar.

19 noyabr 2024-cü il tarixində məhkəmə Əbilovun həbs müddətini 4 ay uzadıb.