Sülh və Demokratiya İnstitutu Azərbaycanda kütləvi repressiyaları pisləyir

Баку/28.07.20/Turan: Azərbaycanın avtoritar hakimiyyəti dissidentlərin, söz azadlığı və müxalifətin susdurulması üçün COVİD-19 pandemiyasından istifadə edir. Neftin qiymətinin ucuzlaşması və pandemiya Azərbaycanda ciddi sosial-iqtisadi problemlərə səbəb olub və vətəndaşları etirazlara sövq edə bilər. Lakin hakimiyyət repressiya yolu ilə istənilən vətəndaş fəallığının qarşısını almaq qərarına gəlib. Bu barədə Sülh və Demokratiya İnstitutunun direktoru Leyla Yunusun bəyanatında deyilir.

Həbslərə 2020-ci ilin martında başlanılıb. Müxalifət lideri Tofiq Yaqubluya və Xalq Cəbhəsi aparıcı müxalifət partiyasının onlarla fəalına qarşı  saxta cinayət ittihamları irəli sürüb.

12-16 iyulda Ermənistan-Azərbaycan dövlət sərhəddində toqquşma baş verib. Həlak olan əsgərlərlə həmrəylik əlaməti olaraq iyulun 14-də axşam Bakının mərkəzində minlərlə insan yürüş edib. Hakimiyyət onlarla müxalifətçini məsuliyyətə cəlb etmək üçün vətəndaşlarla polis arasında toqquşma yaradıb. Jurnalistlərin çəkdikləri videodan aydın görünür ki, qapısı gözlənilmədən açılan parlamentin binasına ilk daxil olanlardan biri  DTX əməkdaşları, o cümlədən general-mayor Rauf Xələfovdur (prezidentin bibisi oğlu).

Aydın görünür ki, DTX zabitləri də daxil olmaqla nümayişçilər parlamentin foyesinə daxil olur, sonra isə onu tərk edirlər. Orada heç bir şeyə ziyan dəyməyib və sındırılmayıb. 

Lakin iyulun 21-də İlham Əliyev müxalifəti dövlət çevrilişi hazırlamaqda ittiham edib. Onun sözlərinə görə, bu, parlamentin binasını ələ keçirməklə başlayıb.

Bundan sonra bir neçə sutka ərzində təxminən 150 nəfərə yaxın adam saxlanılıb. Onları vəhşicəsinə döyüblər, işgəncə veriblər, qarşıdakı çevriliş haqqında ifadə verməyi tələb ediblər. Onlarla vətəndaş inzibati ittihamlara cəlb edilərək 15 gündən 60 günədək həbsdə saxlanılıb.

İctimai asayişin pozulması, hakimiyyət nümayəndələrinə müqavimət göstərilməsi ittihamları ilə 29 vətəndaşa qarşı cinayət işi başlanılıb.

Hazırda ölkədə siyasi məhbusların sayı 190 nəfərə çatıb, repressiyalar isə davam edir. Beynəlxalq birlik müdaxilə etməsə, onların sayı bundan sonra da artacaq,  bəyanatda bildirilir.

Xatırladaq ki, Leyla və Arif Yunuslar Azərbaycanda yalan ittihamlarla həbs edilərək mühakimə olunublar. Bir neçə il həbsxanada qaldıqdan sonra buraxılıblar. Onlar Niderlanda mühacirət ediblər və hazırda orada yaşayırlar. -02D-