Sürgündən qayıtmış Samvel Babayan iki qarabağlını qaldırmağa gedir

Yerevan/26.05.16/Turan-Armİnfo: Bu günlərdə Qarabağ silahlı qüvvələrinin keçmiş komandanı Samvel Babayan Rusiyadan Yerevana qayıdıb və Qarabağa qayıtmaq istədiyini bəyan edib.

Qeyd edək ki, Babayan Ermənistanda dolanmaq üçün vəsaiti qalmadıqdan sonra faktiki olaraq sürgün həyatı yaşayırdı, bundan əvvəl isə o, “prezident” Arkadi Qukasyanın həyatına qəsd etdiyinə görə 9 il həbsdə keçirdiyi Qarabağdan sürgün edilmişdi.

Aprel müharibəsindəki itkilərdən sonra Ermənistan rəhbərliyi ordunun döyüş əhval-ruhiyyəsini artırmaq üçün qızğın şəkildə resurslar axtarır. Generalların və zabitlərin işdən azad edilməsi dalğası da məhz buna yönəlib. Bu fonda ermənilərə nüfuzuna xələl gəlməmiş əzmli zabitlər lazımdır.

Ermənistana qayıtdıqdan sonra o mətbuata bildirib ki, hələ 2013-cü ildə Ermənistan prezidentinə məktub yazıb, ona Azərbaycanın hərbi təhlükələri barədə xəbərdarlıq edib. Amma oun tövsiyələrinə qulaq asmayıblar.

Aprel müharibəsinə toxunan Babayan Ermənistan tərəfin Rusiyanın ünvanına olan ittihamlarını təkzib edib. “90-cı illərdə biz müharibədə qələbə qazandıq və Bakıda Rusiyanın ermənilərə kömək etməsindən şikayətlənirdilər. Bu, yanlış taktikadır və indi biz onu təkrar edirik. Rusiya heç vaxt Qarabağda bizim yerimizə döyüşməyib, döyüşmür və döyüşməyəcək”.

Rusiyanın Azərbaycana döyüş əməliyyatları üçün razılıq verdiyi barədə fikri şərh edən Babayan qeyd edib ki, “razılıq” siyasəti ciddi rol oynamır və oynaya bilməz. “Vaxtilə biz Kəlbəcər, Zəngilan, Füzuli və Cəbrayılı heç bir beynəlxalq “razılı” olmadan azad etmişik. Və əksinə, biz bunu böyük dövlətlərin və beynəlxalq ictimaiyyətin iradəsinə zidd etmişik. Beynəlxalq münasibətlərdə belə bir atalar sözü var – güc hüquq doğurur”, deyə o bildirib.

Ermənistan hakimiyyətinin RF-dən lazımi həcmdə silah almaması ilə bağlı suala cavabda Babayan qeyd edib ki, 2011-ci ildə Kazan görüşündən sonra Ermənistan və Azərbaycan prezidentləri tamamilə bir-birinə zidd nəticələr çıxarıblar. Azərbaycan bundan əvvəl də öz arsenalını xeyli müasiləşdirməyə müvəffəq olmuşdu, görüşdən sonra isə bu proses yeni impuls aldı. Ermənistan rəhbərliyi isə, əksinə, Azərbaycanın təklif edilmiş nizamlanma prinsiplərindən imtina etdiyinə görə təcrid vəziyyətə düşəcəyini və döyüş əməliyyatlarına başlamağa cürət etməyəcəyini hesab edib, amma yanılıb.

Babayanın fikrincə, Azərbaycan danışıqlarda güzəştə getməyəcək və hərbi təzyiqi davam etdirəcək. Ermənistan təcili tədbirlər görməlidir. “Ordunun tamamilə müasirləşdirilməsi və keyfiyyətcə daha fərqli səviyyədə idarə olunması üçün ən az 10 ay tələb olunacaq. Bu, müasir silahların və döyüş sursatlarının alınmasına da aiddir”, deyə o bildirib. Daha sonra o qeyd edib ki, Qarabağa gedir, o, “əsas missiyasını orada görür, qalan şeyləri isə xalq həll etməlidir”.

Müşahidəçilərin fikrincə, Babayanın gəlişi Qarabağda vəziyyəti gərginləşdirəcək. Orada hərbiçi tərəfdarları onu silahlı qüvvələrin rəhbərliyinə qaytarmağa çalışacaqlar. Bu, rəhbərliyin qalan hissəsi ilə qaçılmaz gərginlik və münaqişəyə səbəb olacaq. Babayan Qarabağ ətrafındakı ərazilərin azad edilməsinə qarşı amansız mövqeyi və tərs xasiyyəti ilə də məşhurdur.

Buna görə yaxın günlərdə Babayanın Azərbaycanla müharibəyə başlamağın tərəfdarı olan Jirayr Sefilyan kimi radikal hərbiçilərlə birləşəcəyini gözləmək olar. Bu qüvvələrin Qarbağda və Ermənistanın özündə kifayət qədər güclü sosial bazası olduğunu düşünmək üçün hər cür əsas var.

* General-leytenant Samvel Babayan 1992-ci ildən Qarabağ separatçılarının rəhbərlərindən biri olub. Şuşanın ələ keçirilməsi əməliyyatında iştirak edib, daha sonra Qarabağ qüvvələrinin komandanı olub. Bişkekdə atəşkəs protokolunu imzalayanlardan biri olub. 2001-ci ildə “DQR prezidentinə” qarşı sui-qəsd təşkil etməkdə ittiham olunub və 15 il müddətinə azadlıqdan məhrum edilib, 2010-cu ildə azad edilib. -02D-