Tanınmış müsavatçılar Qubad İbadoğlunun partiyadan çıxarılmasını pisləyirlər

Müsavat Partiyasının bir qrup üzvü partiya sədrliyinə keçmiş namizəd Qubad İbadoğlunun təşkilatın sıralarından xaric edilməsilə bağlı partiya rəhbəlriyinə müraciət ünvanlayıb. 

Partiyanın VIII qurultayından sonra tutduqları mövqeyə görə partiya üzvlərinin qurumdan kənarlaşdırılması siyasi repressiya kimi dəyərləndirilir. Müəlliflər tutduqları mövqeyə görə partiya üzvlərinin cəzalandırılması prosesini “qurumun rəhbər sturkturlarına olan etimada və partiyanın ictimai nüfuzuna zərbə” sayırlar.

Partiya sədrliyinə keçmiş namizəd Q.İbadoğlunun partiyadan kənarlaşdırılması, Qadınlar Birliyinin sədri Ellada Məmmədovaya xəbərdarlıq edilməsi onsuz da mürəkkəb olan partiyadaxili durumun daha da gərginləşdirilməsi kimi şərh edilir. “Bütün bunlar Müsavat Partiyasının bərpası və quruculuğunda, inkişafında xidməti olan biz müsavatçıları ciddi narahat edir”, - müəlliflər bildiriblər.

Müəlliflərə görə, partiyaya münasibətdə tutduqları tənqidi mövqe ilə bağlı üzvlərin cəzalandırılması qurumun imicini korlayır, gələcəyinə olan inamı azaldır, partiyadakı mövcud duruma görə indiki partiya rəhbərlyinin məsuliyyət daşıdığı xüsusi olaraq vurğulanır.

Müraciət müəllifləri partiya rəhbərliyini demokratik prinsiplərə, ifadə azadlığına, riayət  etməyə, tənqidi mövqeyə görə üzvləri cəzalandırmağa son qoymağa çağırırlar.

Müraciəti Müsavat Partiyasının sabiq başqan müavinləri: tanınmış jurnalist Mehman Cavadoğlu, fəlsəfə doktoru Məryəm Oruclu, Müsavat Partiyasının sabiq Divan üzvləri: professorlar Almaz Əliqızı, Adil Qeybulla, fəlsəfə doktorları Vurğun Əyyub, Rafiq bəy İsmayıl, Məlahət Mürşüdlü, Hökümə İbrahimli,  Müsavat Partiyası Mərkəzi Nəzarət Təftiş Komissiyasının sabiq sədri İbrahim İbrahimli,  hüquq müdafiəçiləri Novella Cəfəroğlu və Səidə Qocamanl imzalayıblar. -05D-.