Toplum TV işini xaricdən davam etdirəcək

Toplum TV internet nəşri Azərbaycanda fəaliyyətini dayandırdığı haqqında bəyanat yayıb.

"2016-cı ildən etibarən fəaliyyət göstərən qurum jurnalistika prinsiplərini rəhbər tutaraq ölkədə və dünyada baş verən hadisələr ilə bağlı vətəndaşları məlumatlandırmağı qarşısına əsas məqsəd qoyub.

Bu dövr ərzində minlərlə material dərc edərək oxucular üçün tərəfsiz və qərəzsiz informasiya mənbəyinə çevrilib", deyə nəşrin bəyanatında bildirilir.

Lakin son il yarım ərzində ölkədə mediaya qarşı təzyiqlər Toplum TV-dən də yan keçməyib, qurumun təsisçisi və bir neçə əməkdaşı həbs edilib, onlar haqqında "qaçaqmalçılıq" ittihamı ilə cinayət işləri açılıb, digərlərinin də ölkədən çıxışına qadağa qoyulub.

Nəşrin əməkdaşlarına qarşı təzyiqlərin motivi Toplum TV-nin müstəqil media olaraq vətəndaşların problemlərini işıqlandırması, müxtəlif qruplardan olan şəxsləri öz canlı yayımlarına dəvət etməsidir.

"Təəssüf ki, ölkədə mediaya olan təzyiqlər Toplum TV-nin ölkədə fəaliyyət göstərməsini mümkünsüz edir. Buna görə də Toplum TV bundan sonrakı fəaliyyətini ölkə xaricində yaşayan jurnalistlər vasitəsilə həyata keçirəcək. Ümid edirik ki, verdiyimiz bu qərarı oxucularımız anlayışla qarşılayacaq.", deyə Toplum TV-nin bəyanatında qeyd edilir.

* 6-8 mart 2024-cü il tarixlərində Toplum TV nəşrinin və onun tərəfdaşı olan və Akif Qurbanovun rəhbərlik etdiyi təşkilatın - Demokratik Təşəbbüslər İnstitutunun 9 əməkdaşı saxlanılıb.
Yeddi nəfər qaçaqmalçılıq ittihamı ilə 4 ay müddətinə həbs olunub, iki nəfər isə polis nəzarətinə verilib.

Yanvarın 17-də onların hamısına qarşı CM-in daha 6 maddəsi ilə iqtisadi cinayətlərə dair ittihamlar irəli sürülüb. Polis nəzarətində olan jurnalist Fərid İsmayılov da həbs edilib.

Ötən həftə Toplum TV-nin redaktoru Şahnaz Bəylərqızı da Toplum TV-nin işindən ayrıca icraata ayrılmış yeni iş üzrə həbs edilib.