Transparency Azerbaijan ittihamları təkzib edir

“Şəffaflıq Azərbaycan” Korrupsiyaya qarşı Mübarizə İctimai Birliyi mayın 2-də Milli Məclisin iclasında bir sıra millət vəkilləri tərəfindən qurumun ünvanına səslənən fikirlərə münasibət bildirib.

Qurumun yaydığı məlumatda deyilir ki, parlamentin bugünki iclasında qurum və onun rəhbəri Rəna Səfərəliyeva haqqında “şaiyələrə əsaslanaraq səsləndirilən fikirləri” təəssüflə qarşılayırlar.

“Hesabatın məğzi ilə bağlı olmayan, əvəzində Rəna xanımın şəxsinə yönəlmiş bu ittihamların əsassız olduğunu xüsusi həssaslıqla vurğulamaq istəyirik”, - deyə açıqlamada qeyd edilir.

“KİV-də müzakirə olunan və bəzi millət vəkilləri tərəfindən ciddi tənqid ilə qarşılanan hesabatla bağlı onu demək istəyirik ki, sənəd hazırlanarkən çoxsaylı mənbələrə istinad olunub.

Hesabatın hazırlandığı dövrdə Milli Məclisin rəhbərliyinə sənəddə qoyulan suallara cavab almaq üçün müraciətlər ünvanlanıb. Təəssüf ki, 2013-cü ilin sentyabr və noyabr aylarında parlamentə iki sorğu göndərilsə də, suallara cavab verilməyib”.

Təşkilat onu da açıqlayıb ki, Şərq regionu üzrə Avropa Qonşuluq Siyasətində “Milli  Davranış Sisteminin qiymətləndirilməsi” layihəsi çərçivəsində bəzi sahələrlə bağlı qiymətləndirmə aparıb. Bu sahələr arasında qanunverici, məhkəmə, icraedici hakimiyyətlər, dövlət sektoru və o cümlədən dövlət satınalmaları, hüquq-mühafizə və seçki idarəetmə orqanları, Ombudsman İnstitutu, o cümlədən, siyasi partiyalar, media, vətəndaş cəmiyyəti və biznes sektoru var.

“Artıq bu sahələrlə bağlı hesabatların ilkin varinatı hazırdır”, - deyə təşkilat açıqlamasında bildirir.

O da nəzərdə tutulub ki, hesabatın ilkin variantı KİV-də müzakirəyə çıxarılsın. Hesabatın tam mətni bu il may ayının sonlarında ictimaiyyətə təqdim olunacaq. -16D-