Türkiyə Azərbaycanı dəstəkləməyə davam edəcək – Hulusi Akar

Ankara/22.10.20/Turan: Son 30 il ərzində Ermənistan-Azərbaycan münaqişəsinin nizamlanması üzrə heç bir təsirli addım atılmayıb. Bu barədə cümə axşamı Türkiyənin milli müdafiə naziri Hulusi Akar bildirib.

“30 il ərzində nə edilib? Böyük bir heç nə! Ermənistan tərəfdən açılan atəşin artmasına cavab olaraq Azərbaycandakı qardaşlarımız əks-hücum əməliyyatına başlayıblar. Bəs buna cavab olaraq bütün bu onilliklər ərzində susanlar və baş verənlərə məhəl qoymayanlar nə etdilər? Fəal şəkildə atəşkəsə və danışıqlara çağırmağa başladılar. Bu, tamamilə qeyri-səmimi mövqedir”, deyə Anadolu Agentliyi Akardan sitat gətirir.

“Ermənistan işğal edilmiş ərazilərdən qoşunlarını çıxarmalıdır. Yerevanın qonşu ölkəyə göndərdiyi muzdlular və terrorçular da Azərbayan torpaqlarını tərk etməlidir”, deyə Türkiyəli nazir qeyd edib.

Hulusi Akar Türkiyənin bundan sonra da Azərbaycanın ədalətli mübarizəsini ən yüksək səviyyədə dəstəkləməyə davam edəcəyini vurğulayıb.

Sentyabrın 27-də başlamış döyüşlər zamanı Azərbaycan Silahlı Qüvvələri Ermənistanın işğal etdiyi 120-dən çox yaşayış məntəqəsini, o cümlədən Zəngilan, Cəbrayıl və Füzuli şəhərlərini, habelə Hadrut qəsəbəsini azad edib. -02D-