Ermənilərin Qarabağda mədəni muxtariyyəti ola bilər – İ.Əliyev

Bakı/22.10.20/Turan: Qarabağ Bakının nəzarəti altına qaytarıldıqdan sonra onun erməni əhalisinə mədəni muxtariyyət verilə bilər, bu barədə cümə axşamı Yaponiyanın Nikkei nəşrinə müsahibəsində prezident İlham Əliyev bildirib.

"Dağlıq Qarabağda yaşayan həmin ermənilər bizim vətəndaşlarımızdır. Dağlıq Qarabağdakı ermənilər tam əmin ola bilərlər ki, Azərbaycan vətəndaşları olaraq onların təhlükəsizliyi təmin ediləcək. Dağlıq Qarabağdakı cinayətkar xunta kənarlaşdırılandan sonra onlar daha yaxşı yaşayacaqlar”, deyə o qeyd edib.

Sözlərinin təsdiqi kimi Əliyev qeyd edib ki, Azərbaycanda hazırda da “minlərlə erməni yaşayır”, Bakının mərkəzində isə erməni kilsəsi var.

Əliyevin sözlərinə görə, erməni əhaliyə mədəni muxtariyyət verilə bilər. “Biz Avropanın inkişaf etmiş ölkələrində bu nümunələri görürük ki, insanların öz bələdiyyələrində, öz icmalarında müəyyən hüquqları var”, deyə o qeyd edib. -02D-