Türkiyə hərbi rəhbərliyi Bakıya gəlir

Bakı/12.08.20/Turan: Bu gün Türkiyənin milli müdafiə naziri Hulusi Akar və Baş Qərargah rəisi Yaşar Gülər, həmçinin qoşun növü komandanları və digər yüksək rütbəli hərbçilər Azərbaycana gəlirlər.

Azərbaycan Müdafiə Nazirliyinin məlumatında deyilir ki, Türkiyə nümayəndə heyəti Azərbaycan-Türkiyə quru qoşunları və Hərbi Hava Qüvvələrinin birgə döyüş atışlı taktiki və taktiki-uçuş təlimlərinin Yüksək Səviyyəli Müşahidəçi günü çərçivəsində təlimlərin birinci mərhələsinin son epizodunu izləyəcək.

Təlimlər Azərbaycan ilə Türkiyə arasında hərbi əməkdaşlıq haqqında sazişə uyğun olaraq keçirilir. Təlimlərdə hər iki ölkənin quru qoşunlarının və Hərbi Hava Qüvvələrinin bölmələri iştirak edir. Təlimlərə şəxsi heyət, zirehli texnika, artilleriya qurğuları və minaatanlar, həmçinin hərbi aviasiya və hər iki ölkənin ordularının Hava Hücumundan Müdafiə vasitələri cəlb edilib.

Plana əsasən, quru qoşunlarının cəlb edilməsi ilə təlimlər avqustun 1 – dən 5-dək Bakı və Naxçıvanda, hərbi aviasiyanın iştirakı ilə iyulun 29-dan avqustun 10-dək Bakı, Naxçıvan, Gəncə, Kürdəmir və Yevlaxda keçirilib.

Qeyd edək ki, avqustun 11-də XİN rəhbəri Ceyhun Bayramov və müdafiə naziri Zakir Həsənov Ankarada olublar. Onları Türkiyə prezideti Rəcəb Tayyib Ərdoğan qəbul edib.-0