Türkiyə Rusiyanın Ukraynaya qarşı təcavüzünü qınayır

Bakı/24.02.22/Turan: Türkiyə bir daha Rusiyanı və Ukraynanı bütün fikir ayrılıqlarını Minsk razılaşmaları çərçivəsində dialoq yolu ilə həll etməyə çağırır. Bu barədə cümə axşamı prezident Recep Tayyip Erdoğan bildirib.

O qeyd edib ki, Türkiyə Rusiyanın Ukraynaya qarşı hərbi əməliyyatını yolverilməz hesab edir. Türkiyə lideri Ankaranın Rusiyanı və Ukraynanı dost ölkələr hesab etdiyini vurğulayıb.

"Rusiya və Ukrayna arasında qarşıdurma bizdə təəssüf yaradır", deyə Anadolu Agentliyi Erdoğandan sitat gətirir.   

Türkiyə Kiyevin ərazi bütövlüyünün müdafiəsi üzrə mübarizəsini dəstəkləyir, "mən bunu bu gün telefon söhbəti zamanı Ukrayna prezidenti Vladimir Zelenskiyə də bildirdim", deyə Erdoğan qeyd edib.

"Rusiyanın Ukraynaya hərbi müdaxiləsi beynəlxalq hüquq normalarına ziddir və regionda sülh və sabitliyə ciddi zərbə vurur", deyə Türkiyə lideri bildirib.

Türkiyə ölkə vətəndaşlarının, qardaş Krım-tatar xalqının və Ukraynada yaşayan hər kəsin təhlükəsizliyini təmin etmək üçün zəruri səyləri göstərməyə hazırdır, deyə Türkiyə prezidenti qeyd edib. -02D-