Türkiyə və Azərbaycan KİV sahəsində qarşılıqlı əlaqələri bundan sonra da inkişaf etdirməyi planlaşdırırlar

Bakı/09.12.20/Turan: Türkiyə Prezident Administrasiyasının İctimaiyyətlə Əlaqələr İdarəsindən “Anadolu” agentliyinə bildiriblər ki,  prezident Rəcəb Tayyib Ərdoğanın Bakıya səfəri çərçivəsində cümə axşamı “Türkiyə və Azərbaycan arasında media sahəsində strateji əməkdaşlığa dair niyyət memorandumu "nun imzalanması planlaşdırılır.

Prezidentlər Rəcəb Tayyib Ərdoğan və İlham Əliyevin iştirakı ilə sənədləri Türkiyə Prezidenti Administrasiyası İctimaiyyətlə Əlaqələr İdarəsinin rəhbəri Fəxrəddin Altun və Azərbaycan prezidentinin köməkçisi, xarici siyasət məsələləri şöbəsinin müdiri Hikmət Hacıyev imzalayacaq.

İki qardaş ölkənin informasiya sahəsində əlaqələrin daha da möhkəmləndirilməsinə yönələn memoranduma uyğun olaraq  birgə media platforması yaradılacaq.

Bu platforma iki ölkənin KİV orqanlarına Türkiyə və Azərbaycan üçün əhəmiyyətli olan məsələlərdə öz siyasətini koordinasiya etməyə imkan verəcək ki, bu da informasiya axınının effektivliyini artıracaq. Birgə media platforması çərçivəsində rəsmi KİV orqanları təcrübə və imkanlarını bölüşəcəklər.

Platforma həmçinin beynəlxalq arenada dezinformasiya axınına qarşı fəal mübarizə aparmağa və iki ölkənin reallıqları barədə dünyanı obyektiv məlumatlandırmağa imkan verəcək.

Niyyət memorandumu qüvvəyə mindikdən sonra 3 ay ərzində birgə media platformasının ətraflı fəaliyyət planı hazırlanaraq və rəhbər orqanlara təqdim ediləcək.

Türkiyə Prezident Administrasiyasının nümayəndəsi Fəxrəddin Altun yaradılan qurumun əhəmiyyətini qeyd edib.

 "Türkiyə və Azərbaycan dünya ictimaiyyəti üçün kritik bir dövrdə yalan axını ilə birgə mübarizə aparacaqlar. Dağlıq Qarabağın işğaldan azad olunması uğrunda mübarizə dövründə biz hamımız Azərbaycan və Türkiyənin imicinə zərbə vurmaq cəhdlərinin bir daha şahidi olduq. Buna görə də informasiya sahəsində birgə tədbirlər həyati əhəmiyyət kəsb edir", - Türkiyə liderinin administrasiyasının Əlaqələr İdarəsinin rəhbəri deyib.

Azərbaycan prezidentinin köməkçisi Hikmət Hacıyev də F.Altunun fikri ilə razılaşıb.

Onun sözlərinə görə, Azərbaycan və Türkiyə bütün zamanlarda və istənilən şəraitdə, o cümlədən media sahəsində sıx əməkdaşlıq etməlidirlər və bu da hər iki ölkənin maraqlarına töhfə verəcək.

H.Hacıyev iki qardaş dövlətin mövqeyinin irəliləməsi üçün yeni platformanın əhəmiyyətini qeyd edib.0—