Türkiyə və Azərbaycan liderləri sazişlər və əlamətdar layihələr vasitəsilə daha sıx əlaqələr qurur

Bakı/25.09.23/Turan: Türkiyə prezidenti Recep Tayyip Erdoğan və Azərbaycan prezidenti İlham Əliyev iki ölkə arasında müxtəlif sahələrdə 3 saziş imzalayıb.

Naxçıvanda bir günlük işgüzar səfərdə olan prezident Erdoğan Azərbaycan prezidenti İlham Əliyevlə görüş keçirib. Prezidentlərin görüşü Naxçıvan Muxtar Respublikasının Ali Məclisində "təkbətək" formatda keçirilib. 

Görüşdən sonra Erdoğan və Əliyevin iştirakı ilə iki ölkə arasında sazişlərin imzalanması mərasimi keçirilib. 

Prezident Erdoğan və prezident Əliyev "Azərbaycan Respublikası ilə Türkiyə Respublikası arasında Qars-Naxçıvan dəmir yolu layihəsinə dair Niyyət Protokolu"nu imzalayıblar. 

"Qars-Naxçıvan dəmir yolunun tikintisi haqqında Niyyət Protokolunun imzalanması da tarixi hadisədir. Əminəm ki, bu layihə də uğurla həyata keçiriləcək və beləliklə, həm Azərbaycana, Türkiyəyə, həm də Orta Dəhlizin şaxələnməsi olaraq digər ölkələrə xidmət edəcək", deyə Erdoğan bildirib.

Ətraf mühit, şəhərsalma və iqlim dəyişikliyi naziri Mehmet Özhaseki və Azərbaycanın Dövlət Şəhərsalma və Arxitektura Komitəsinin sədri Anar Quliyev Azərbaycan Respublikası Hökuməti ilə Türkiyə Respublikası Hökuməti arasında Türkiyə Respublikasının Kahramanmaraş vilayətində yaşayış binaları, ibtidai məktəb, uşaq bağçası və mədəniyyət mərkəzinin tikilməsi haqqında Əməkdaşlıq Sazişi"ni imzalayıblar. 

"Azərbaycan Respublikasında və Türkiyə Respublikasında bərpa olunan enerji mənbələrindən istehsal olunan elektrik enerjisinin ötürülməsi sahəsində Azərbaycan Respublikasının Energetika Nazirliyi və Türkiyə Respublikasının Energetika və Təbii Sərvətlər Nazirliyi arasında əməkdaşlığa dair Anlaşma Memorandumu"nu Azərbaycanın energetika naziri Pərviz Şahbazov və Türkiyənin energetika və təbii sərvətlər naziri Alparslan Bayraktar imzalayıblar.

Burada eyni zamanda prezidentlərin iştirakı ilə Iğdır-Naxçıvan qaz boru kəmərinin təməlqoyma mərasimi keçirilib.

Prezidentlər Naxçıvanın bərpa-istehsalat hərbi kompleksinin açılışında iştirak ediblər.

Ötən il iki ölkə arasında ticarət dövriyyəsi 6 milyard dollardan çox olub.

Əliyev qeyd edib ki, bu ilin yeddi ayı ərzində ticarət dövriyyəsi daha 40 faiz artıb və daha da artacaq: "Doğrudur, hədəf çox yüksək rəqəmlərlə ölçülür. Bir müddət əvvəl biz 15 milyard dollarlıq ticarət dövriyyəsini hədəfləyirdik. Həmin vaxt ticarət dövriyyəsi təxminən 2 milyard dollar təşkil edirdi. Amma indi dövriyyə 6 milyard dolları keçib. Yaxın gələcəkdə, çox güman ki, bu rəqəmə də çatacağıq". 0