Türkiyənin ən böyük think-tank strukturu Azərbaycanı dəstəkləyib

Bakı/03.10.20/Turan: Türkiyənin ən böyük think-tank qrupu olan Avrasiya Strateji Araşdırmalar Mərkəzi (ASAM) Azərbaycanın Ermənistanın təcavüzünə cavab hərəkətlərini dəstəkləyib.

Türkiyənin “Yeni şafak” və “Sabah” qəzetləri ASAM-ın İdarə Heyətinin sədri Murat Doğanayın imzası ilə bu qurumun dünya birliyinə müraciətini müraciətini dərc ediblər. 7 bənddən ibarət müraciətdə deyilir: “Bütün dünya bilsin ki, türk milləti axıra qədər azərbaycanlı  qardaşlarının yanındadır. Əvəzi nə olursa-olsun, biz buna hazırıq. Ermənistan işğal etdiyi Azərbaycan torpaqlarından  çıxmadığı müddətcə dövlətimizin atacağı  hər  bir addımı qeydsiz-şərtsiz dəstəkləyəcəyimizi hamının bilməsini istəyirik. Tək deyilsən, qardaş Azərbaycan! Arxanda Türkiyə dövləti var. Yanında böyük türk milləti var!”

Müraciəti  başda Türkiyə Böyük Millət Məclisinin keçmiş sədri İsmail Qəhrəman olmaqla, Ədalət və Kalkınma Partiyasının mənsubu olan keçmiş nazirlər, millət vəklləri, yüksək vəzifəli məmurlar, nazir müavinləri, yüksək rütbəli məmurlar, alimlər, QHT sədrləri və təmsilçiləri, digər siyasi partiyalardan olan şəxslər imzalayıblar.

Avrasiya Strateji Araşdırmalar Mərkəzi 1994-cü ildə Avrasiya Bir Vəqfinin nəzdində yaradılıb.Türkiyənin dünya miqyasındakı ən güclü think-tank qrupu sayılan Mərkəz indiyə qədər Türkiyədə və xarici ölkələrdə 3000-dən çox konfrans təşkil edib, minlərlə kitab çap edib. Erməni Araşdırmaları İnstitutu “erməni məsələsi”nin mahiyyətini araşdırıb  türk ictimaiyyətilə bölüşən 100-dən çox kitab çap etdiyi kimi, ASAM da Türkiyəyə qarşı yönəlmiş “soyqırım” iddialarına qarşı  faktlara cavab vermək məqsədilə hər 3 ayda bir ingiliscə dərgi  çıxarır. Bu,”soyqırım” iddialarına qarşı Türkiyədə ingiliscə çap edilən yeganə dərgidir. Hər ilin fevralında ermənilərin Xocalıda törətdiyi soyqırımla bağlı konfrans keçirən ASAM-ın gündəmində Türk dünyasının və ümumilikdə,Avrasiya coğrafiyasının problemlərinin araşdırılması əsas yer tutur.—0—