Ukraynadan olan 30 uşaq Azərbaycanda reabilitasiya keçəcək

Bakı/08.04.23/Turan: Ukraynada müharibədə əziyyət çəkən 30 uşaq istirahət üçün bu gün Bakıya gəlib. 14 gün ərzində onlar Bakı, Şamaxı, Qəbələ və Şəkidəki uşaq düşərgələrində reabilitasiya keçəcəklər.

Ukraynanın Azərbaycandakı səfiri Vladislav Kanevski bildirib ki, təşəbbüs Azərbaycanın Əmək və Əhalinin Sosial Müdafiəsi Nazirliyi yanında Sosial Xidmətlər Agentliyi tərəfindən həyata keçirilib.

Fərdi konsultasiyalar, qrup terapiyası, meditasiya və yoqa dərsləri, psixososial təlimlər, peşəkar psixoloqlar tərəfindən keçirilən ustad dərsləri vasitəsilə uşaqların emosional vəziyyətinin sabitləşməsi təmin ediləcək.

“Biz ikinci ildir ki, azərbaycanlı dostlarımızla birlikdə Rusiyanın silahlı təcavüzü nəticəsində zərər çəkmiş ukraynalı uşaqların yaxşılaşdırılması və reabilitasiyası layihəsini həyata keçirməyə davam edirik.

Bu dəfə Azərbaycana Azərbaycana Ukraynanın suverenliyini və ərazi bütövlüyünü rus işğalçılarından müdafiə edən və ya təəssüf ki, vətənimizin işıqlı gələcəyi naminə canlarından keçmiş şəxslərin uşaqları gəlib”, - deyə səfir Facebook səhifəsində yazıb.

Rusiya Ukraynaya qarşı müharibə başlayandan Azərbaycan Ukraynaya humanitar yardım edir. Rəsmi məlumatlara görə, Azərbaycanın göstərdiyi yardımın ümumi məbləği 43 milyon manatdan çox olub.

Bundan başqa, Azərbaycanda müharibədən əziyyət çəkən və ya ailə üzvlərini itirmiş 120 ukraynalı uşaq tibbi və sosial-psixoloji reabilitasiyadan keçib.

Azərbaycan İrpen şəhərində Zərifə Əliyeva adına 12 nömrəli məktəbin bərpasını öz üzərinə götürüb.

Azərbaycan Dövlət Neft Şirkətinin Ukrayna filialı olan “SOCAR Energy Ukraine” müharibə başlayandan təcili tibbi yardım və yanğınsöndürən maşınları pulsuz olaraq yanacaqla təmin edir. 06B